Жывёлагадоўля

Адказны час

Для чалавека зіма пачынаецца напрыканцы лістапада, але запаўняць засекі ён пачынае загадзя. І калі для нас “загатоўкі” — справа прывычная і знаёмая, то для рагулі такія змены нясуць значны стрэс. Справа ў тым, што перавод жывёлы з летняга пашавага перыяду на зімова-стойлавае ўтрыманне прадугледжвае істотнае змяненне ў харчаванні, што патрабуе пэўнага часу для адаптацыі. Таму ў пераходны перыяд вельмі важна, каб каровы прывыкалі да стойлавага рацыёну паступова. Працэс гэты не аднадзённы: нельга сёння пасвіць жывёлу, а заўтра пакінуць у кароўніку. Чым хутчэй жывёлы адаптуюцца да новых умоў    утрымання, тым менш будуць страты малака. Каляндарная зіма ў жывёлаводаў пачынаецца 15 кастрычніка, але тэрмін гэты ў нейкай меры ўмоўны. Пастаноўка дойнага статка ў памяшканні заўсёды пачынаецца ў верасні.

— Знізіць або зусім пазбегнуць стрэсавых з’яў пры пераводзе кароў і захаваць іх прадукцыйнасць можна правільным кармленнем, — расказала намеснік начальніка ўпраўлення па сельскай гаспадарцы і харчаванні райвыканкама Алена Кадуш. — Галоўныя ўмовы — забеспячэнне дастатковай колькасцю кармоў і паступовасць прывучання да новых. Ва ўсіх гаспадарках раёна вядзецца актыўная нарыхтоўка кукурузнага сіласу. Па стане на 23 верасня яго закладзена 48 тысяч тон. Таксама на зіму ўжо назапашана 35% да задання сена і 65% — сенажу. Засекі папаўняюцца што-дзённа, таму гэтыя лічбы не канчатковыя.

Зараз вялікі груз адказнасці ляжыць на заатэхніках, якія непасрэдна і арганізуюць перавод дойнага статка ў “зімовы рэжым”. У харчаванне рагулям паступова ўключаецца сена, сянаж, потым будзе паўнацэнная кармасумесь сена, сенажу і сіласу.

Сёння можна сказаць, што каровы адаптуюцца да новага рацыёну кармлення ў планавым рэжыме. Вялікіх скокаў няма. Усяго ж на фермах сельгаспрадпрыемстваў раёна налічваецца 21 653 галавы буйной рагатай жывёлы, у тым ліку 7 050 дойных кароў.

Таксама важна падрыхтаваць да зімоўкі рагуль і памяшканні. На аб’ектах праводзіцца дэзынфекцыя, уцяпляюцца і пры неабходнасці рамантуюцца дзверы, вокны, дахі, падлогі, бар’еры, агароджы станкоў і гэтак далей. Інжынерныя службы наладжваюць каналізацыйныя і вентыляцыйныя каналы, сістэмы падачы вады ў паілкі. Усё гэта праводзіцца пасля механічнай ачысткі падлог, кармушак, панэляў сцен і выдалення рэшткаў гною і смецця. Ветэрынары назіраюць за жывёлай і праводзяць дэзынсекцыю.

Канечне, гэты перыяд няпросты для жывёлаводаў і, можна сказаць, з’яўляецца вынікам працы гаспадаркі ў цэлым. Бо пераход дойнага статка з летняга пашавага перыяду на зімова-стойлавае ўтрыманне без страт у вытворчасці “малако-мяса” залежыць ад зладжанай і адказнай работы ўсіх працаўнікоў сельгаспрадпрыемства.