Добраўпарадкаванне

Не месца ўпрыгожвае чалавека…

Філіял “Асіповіцкі” ААТ “Бабушкина крынка” асацыюецца ў землякоў не толькі з малочнай вытворчасцю, але і маштабнымі ўпрыгожваннямі, якія змяняюць адно другое ўзімку і летам

Цікава было даведацца, што і тэрыторыя прадпрыемства, якая схавана ад прахожых, радуе вока працаўнікоў і наведвальнікаў кветнікамі на любы густ і арт-аб’ектамі, зробленымі сваімі рукамі. Нездарма ў гэтым годзе “Асіповіцкі” ўзяў прызавое месца ў конкурсе добраўпарадкавання сярод філіялаў холдынга “Магілёўская малочная кампанія “Бабушкина крынка”.

Вельмі прыемна было прайсціся паміж аматарскіх клумб, якія выглядаюць не горш за дызайнерскія. Паверыць у тое, што ўсё гэта ідэі саміх працаўнікоў, якія саджаюць, даглядаюць кветкі і не толькі, няпроста. Напэўна таму, што такая прыгажосць сустракаецца нячаста.

У кожнага вытворчага ўчастка ёсць свая тэрыторыя, за выгляд і чысціню якой адказваюць яго рабочыя, хто можа знайсці хоць хвілінку свабоднага часу. Некаторыя арт-аб’екты вельмі сімвалічныя. Напрыклад, каля ўвахода ў транспартны ўчастак стаіць “Запарожац” у вобразе прыгажуні з накладнымі вейкамі, што выклікае добрую ўсмешку. Таксама ўздымае настрой экспазіцыя веласіпеда і чырвоных гумавых ботаў, якія стаяць нібы іх забылі, і ўжо кветкі з іх палезлі, а яны ўсё яшчэ чакаюць гаспадара. Лебедзі, сажалка, драўляныя хаткі і буслы супакойваюць вока, а вось брутальныя канструкцыі сфер і матылька з металічных прутоў, напоўненыя камянямі, сведчаць, што і мужчыны актыўна прымаюць удзел у добраўпарадкаванні тэрыторыі. Хочацца дадаць, што таксама прыемнай нечаканасцю стаў працуючы фантан. Такія астраўкі свежасці і вільгаці трапляюцца на вуліцах горада і ўчастках іншых прадпрыемстваў, але функцыянуюць далёка не ўсе. Сярод разнастайных кветак і раслін, якія, дарэчы, падабраны з густам, то тут то там сустракаюцца самаробныя вожыкі, чарапахі, мядзведзі і баравікі. Нават ёсць тут вялікі гадзіннік, зроблены з аўтамабільных шын: ён нагадвае пра час, які не трэба губляць. Знешняя тэрыторыя прадпрыемства таксама штогод папаўняецца клумбамі і рознымі кампазіцыямі. Паміж работнікамі няма спрэчкі, чый куток лепш выглядае. Наадварот, дапамагаюць адзін аднаму, дзеляцца расадай і ідэямі. Праўду кажуць: не месца ўпрыгожвае чалавека, а чалавек — месца.