Прадпрыемствы і арганізацыі ўпрыгожваюць райцэнтр архітэктурнымі формамі і кампазіцыямі.

Напрыклад, на перакрыжаванні вуліц Сумчанкі і 60 год Кастрычніка нядаўна з’явіўся макет глобуса з назвай кампаніі, якая яго ўстанавіла, і горада, у якім знаходзіцца. Такім чынам вырашыла парадаваць сваіх працаўнікоў і іх землякоў ЗТАА “Дахавы завод ТэхнаНІКОЛЬ”.

Арт-аб’ект стаў вынікам абмеркавання і апытання супрацоўнікаў. А яго канцэпцыя — транснацыянальная кампанія, якая ўкараняе і выкарыстоўвае комплексныя, прэвентыўныя, прыродаахоўныя стратэгіі прымяняльна да працэсаў, прадукцыі і паслуг з мэтай павышэння экалагічнай эфектыўнасці і зніжэння рызыкі для насельніцтва і навакольнага асяроддзя.

У бліжэйшых планах — добраўпарадкаванне і азеляненне прылеглай да садова-паркавага тапіарыя тэрыторыі. А да дня нараджэння кампаніі “ТэхнаНІКОЛЬ”, які адзначаецца 11 лістапада, кіраўніцтва завода рыхтуе для горада чарговы падарунак. Які? Пакуль сакрэт.

Каля аўтазаправачнай станцыі па вуліцы Юбілейнай таксама нядаўна ўзнікла цікавая інсталяцыя, з дапамогай якой работнікі ТАА “Асіповічыгазбуд” прызнаюцца ў любові да роднага горада. Стварылі кампазіцыю Ірына Жордачкіна і Арцём Качалін.