Сёння ва ўсіх школах краіны гучыць званок, які абвяшчае пачатак новага навучальнага года. Ён першы для Арцёма і Станіслава Асіповічаў.

Хлопчыкі і дзяўчынкі, якія за лета адпачылі і крыху падраслі, увойдуць у свае класы. Для кагосьці гэты год вучобы ў школе — апошні. Іншыя толькі пераступаюць парог установы адукацыі.

Арцём і Станіслаў вельмі чакалі 1 верасня, калі яны стануць вучнямі. Па шляху ведаў іх павядзе Алена Нілава, настаўніца 1 “А” класа СШ № 4.

Бацькі падрыхтавалі хлопчыкам новыя касцюмы, ранцы. Дарэчы, вучэбны год пачынаецца ва ўсёй сям’і. Маці Вольга — педагог Вязаўніцкага ВПК, тата Аляксандр — вадзіцель школьнага аўтобуса Ліпенскай СШ. Маленькаму браціку Саню яшчэ рана садзіцца за парту, але ўрачыстасць моманту адчувае і ён. А як жа: прывёў братоў-двайнят першы раз у першы клас!

Дарэчы, напярэдадні гэту дружную сям’ю ў ходзе акцыі “У школу — з добрым сэрцам” наведалі прадстаўнікі райарганізацыі ГА “БРСМ”, РАНС і РЦКіА, павіншавалі са святам ведаў і падарылі школьныя прылады.