Іна Заскевіч.

i.zaskevich@gzt-akray.by

У гарадскім парку днямі з’явілася сапраўдная казачная паляна. Мядзведзь з бочачкай мёду, лясун, Баба Яга і іншыя героі дзіцячых казак сабраліся вакол хаткі на курынай ножцы. Нібы нейкую сваю чароўную сходку задумалі. Фігуркі і лаўкі зроблены такім чынам, што, як у калейдаскопе, з розных бакоў убачыш розных персанажаў. Цуд!

А падрыхтаваў такі падарунак для мясцовай дзятвы лясгас. Работа яшчэ не завершана. Хутка кампазіцыя будзе дапоўнена новымі выявамі. Да гараджан работнікі прадпрыемства звяртаюцца з адзінай просьбай: ставіцца да драўляных скульптур больш ашчадна. Бо ўжо на этапе мантажных работ цікаўныя наведвальнікі зламалі адзін з элементаў хаткі.