Раней і зараз

Вуліца Сумчанкі

На мяжы гарадской тэрыторыі праходзіць магістраль Мінск-Гомель, а праз яе — таксама важная траса Р91 Асіповічы-Баранавічы. Яшчэ ёсць “драбяза” накшталт дарог Р72 Асіповічы-Свіслач і Р34 Асіповічы-Глуск.

Для гарадоў з вялікім транзітным аўтатрафікам лічыцца добрым тонам афармляць галоўныя ўезды нейкімі іміджавымі знакамі. Асіповічы ў гэтым плане не выключэнне, хаця і не зусім правіла. А ўсё таму, што наш галоўны ўезд — сам сабе імідж. На  2-кіламетровым участку вуліцы Сумчанкі, які злучае дарогі Мінск-Гомель і Асіповічы-Баранавічы, арганізаваны чатырохпалосны рух, устаноўлена сучасная сістэма асвятлення. Сама дарога пабудавана з улікам сучасных патрабаванняў да пасіўнай бяспекі, якія значна зніжаюць верагоднасць ДТЗ.

Гэты ўчастак вуліцы быў галоўным праектам мінулага года ў сферы дарожнага будаўніцтва, аднак на фоне доўгачаканага і адчувальна больш працяглага, чым усе спадзяваліся, капрамонту аўтамабільнага пуцеправода па вуліцы Сташкевіча яго рэалізацыя прайшла для асіпаўчан неяк непрыкметна. Вясной пачалі — напачатку восені скончылі. У поўнай адпаведнасці з графікам ды з мінімальнымі нязручнасцямі для вадзіцеляў, пасажыраў грамадскага транспарту і пешаходаў.