Гэта наша краіна!

Датэрміновае галасаванне праходзіць у гэтыя дні.

На Асіповіччыне, як і ў іншых рэгіёнах, магчымасцю аддаць свой голас за аднаго з кандыдатаў у прэзідэнты ўжо скарысталася не адна сотня выбаршчыкаў.

Старшыня Осаўскага ўчастка для галасавання № 15 Любоў Пяшко адзначае, што выбары ў аграгарадку адбываюцца ў добразычлівай абстаноўцы. Многія мясцовыя жыхары прыходзяць цэлымі сем’ямі. Людзі больш сталага ўзросту падаюць заяўкі, каб члены камісіі наведалі іх непа-срэдна ў дзень выбараў дома.

Алена і Аляксандр Вабішчэ-вічы ўпершыню прыйшлі галасаваць такой дружнай кампаніяй. Дачушка Ульяна падрасла і цяпер разам з дарослымі далучаецца да грамадска-палітычнага жыцця краіны. Можа, таму і выглядае такой сур’ёзнай і засяроджанай? А Паліна сёлета перайшла ў другі клас і, канечне ж, пра выбары ведае больш за сястру, таму і настрой у дзяўчынкі прыўзняты.

Алена цяпер знаходзіцца ў водпуску па доглядзе дзіцяці, а да гэтага працавала ва ўстанове адукацыі. Аляксандр — аператар у дыстанцыі пуці. А разам яны — цудоўная маладая сям’я, якая хоча жыць, гадаваць дзяцей у спрыяльных умовах, мець магчымасці для іх гарманічнага развіцця, быць упэўненымі ў заўтрашнім дні. Яны любяць сваю малую радзіму і ўносяць пасільны ўклад у яе далейшы росквіт.

Дарэчы, жнівень для сям’і Вабішчэвічаў багаты на падзеі. Як агульнарэспубліканскіх, так і асабістага плана: у гэтым месяцы будуць адзначаць дні нараджэння абедзвюх дзяўчынак.

Іна Заскевіч.

i.zaskevich@gzt-akray.by