Добраўпарадкаванне

Сэрца адкрыта для ўсіх

Перасякаючы перакрыжаванне вуліц Сумчанкі і Юбілейнай, пешаходы зараз трапляюць пад арку, якая ўмоўна аддзяляе цэнтральную частку горада ад аўтазаводскага мікрараёна.

Новы арт-аб’ект з’явіўся ў горадзе ў панядзелак. Устанавілі яго мантажнікі УКП ЖКГ. А аўтар канструкцыі — работнік гэтага ж прадпрыемства Сяргей Лясных. У камунальнай арганізацыі ён працуе каля трох гадоў. Звычайна вырабляе элементы водасцёкавай сістэмы, парапеты — неабходныя, але будзённыя рэчы. Аднак найбольш падабаецца Сяргею выконваць штучныя вырабы, у працу над якімі можна ўнесці нешта сваё, праявіць творчасць. Гэта ўжо малыя архітэктурныя формы. Кшталту тых, што ўпрыгожваюць сажалку з боку рэстарана “Пралеска”, а яшчэ выстаўляліся абапал вадаёма  навагодняй парой, — аздобленыя гірляндамі, яны радавалі гараджан узімку. Асабліва юнае насельніцтва.

І вось — новая кампазіцыя. Даволі сімвалічная. Металічная арка ў форме раскрытага сэрца, якое прымае ў сябе кожнага, хто ўваходзіць або ўязджае ў райцэнтр. А яшчэ як указальнік — недалёка знаходзіцца аддзел ЗАГС, так што, маладыя, не губляйцеся, спачатку туды, а потым — да аркі, фатаграфавацца. Дарэчы, асіпаўчане актыўна робяць сэлфі, здымаюць дзяцей на фоне новай архітэктурнай формы. І навінкай задаволены.