Культура

Энергетыка конкурсу магутная

У рамках ХХІХ Міжнароднага фестывалю мастацтваў “Славянскі базар” праходзіў адкрыты турнір нацыянальных танцаў

У ім бралі ўдзел самадзейныя артысты народнага ансамбля народнай песні і музыкі “Сузор’е”: Наталля, Аляксандр, Уладзіслаў Еўдакімовічы, Герман Кухарчык, Віктар Шарамет, Кацярынка Чаропка, Пётр Куралёнак, Яўгенія Шведава, Юрый Гарбачоў, Ірына Дайлідка, Алена Мішур, Раман Дрозд, Дзіяна Шайко, Вера і Ганна Гладкія. Яны прадстаўлялі на творчым конкурсе Магілёўскую вобласць. На танцавальнай пляцоўцы змагаліся за званне лепшых 80 пар з розных рэгіёнаў нашай краіны. Прыемна, што землякі вярнуліся дадому не з пустымі рукамі. Кожны ўдзельнік атрымаў дыплом “За зберажэнне і захаванне беларускай народнай спадчыны”. Асаблівы ж гонар — за пару Вікторыі Шарамет і Уладзіслава Еўдакімовіча: маладыя людзі атрымалі Дыплом лаўрэата І ступені, а таксама за кіраўніка самабытнага калектыву Наталлю Еўдакімовіч, якая стала сярэбраным прызёрам у конкурсе салістаў-харэографаў.

Па словах Наталлі Анатольеўны, на кожным ляжала вялікая адказнасць, тым больш што ў дадзеным турніры выступалі ўпершыню. Не хацелася падвесці людзей, якія даверылі асіпаўчанам адказваць за ўсю вобласць у такім відзе мастацтва, як народны танец. Прычым у скарбонцы магілёўскіх рэгіёнаў — разнастайная палітра народнай харэаграфічнай творчасці: ад «Каробачкі», «Лявоніхі», «Кракавяка», «Полькі-бабачкі», «Барыні» да «Вальса», «Ночкі», «На рэчаньцы» і іншых. Патрабаванні да канкурсантаў былі высокія. Адно з іх — адпаведнасць рухаў і строяў канкрэтнай мясцовасці. Дарэчы, касцюмы для нашых танцораў падрыхтавала вядомая на Асіповіччыне вышывальніца Нэлі Дзербянкова, якая даўно супрацоўнічае з пратасевіцкімі артыстамі. Акрамя дыпломаў, «сузор’еўцаў» узнагародзілі квіткамі на адзін з канцэртаў дзеячоў украінскай культуры. Наогул жа характар, энергетыка конкурсу былі магутныя, эмацыянальнасць — неперадаваемая.

Ніна ВІКТОРЧЫК.

n.viktorchik@gzt-akray.by