Свята

Гасцінна і каларытна

У адзінаццаты раз Александрыя сабрала сяброў з усёй краіны. Былі таксама тут госці з Расіі і Украіны.

Афіцыйную дэлегацыю раёна ўзначальваў старшыня райвыканкама Канстанцін Жыгуцкі.

У цырымоніі адкрыцця можна было бачыць і нашых землякоў. Загадчыку Вяззеўскага дома культуры Мікалаю Забаўскаму і члену Беларускага саюза майстроў народнай творчасці Ірыне Забаўскай выпаў гонар пранесці па фестывальнай пляцоўцы адзін з сімвалаў нашай дзяржавы — сцяг. Народны вакальны ансамбль “Журавушка” Сасноўскага сельскага клуба вітаў наведвальнікаў маштабнага мерапрыемства таленавітым выкананнем песень пад віртуозную ігру на акардэоне Генадзія Вясёлкіна.

Сваю творчасць прадставілі работнікі раённага Цэнтра народных рамёстваў і дэкарытыўна-прыкладнога мастацтва народны майстар Беларусі Вольга Наўдзюнас, ганчар Дзмітрый Палешчук, кераміст Кацярына Юркавец на чале з дырэктарам Аляксандрай Баранавай.

— Мне давялося ўпершыню браць удзел у фестывалі, — гаворыць кіраўнік ЦНРіДПМ. — Горад майстроў уразіў не толькі размахам, але і геаграфіяй. Пазнаёмілася з рамеснікамі з розных куточкаў нашай краіны, а таксама ўкраінскімі і расійскімі. Цікава было назіраць за майстар-класамі, што праводзіліся народнымі ўмельцамі. Дарэчы, Вольга Наў-дзюнас прадэманстравала дасканалае ўменне працаваць на ткацкім станку і прадставіла наш раён у конкурсе нацыянальных строяў, які праводзіўся ўпершыню ў такім фармаце. Ірына Забаўская прывезла ў Александрыю свае каларытныя работы: мужчынскі, жаночы і дзіцячы касцюмы. У цэлым атмасфера свята цудоўная. Парадавала спалучэнне сучаснай культуры і нашых нацыянальных звычаяў.

Ужо стала традыцыяй на “Купаллі” праводзіць узнагароджванне лепшых прадстаўнікоў сель-скагаспадарчай галіны. Двое асіповіцкіх аграрыяў атрымалі з рук старшыні аблвыканкама Леаніда Зайца заслужаныя ўзнагароды: трактарыст-машыніст філіяла “Белшына-агра” ААТ “Белшына” Уладзімір Мяцельскі ўдастоены юбілейнага медаля “100 год органам дзяржаўнага кіра- вання сельскай гаспадаркай і харчаваннем Беларусі”, аператар машыннага даення Марына Уласік з акцыянернага таварыства “Авангард-Ніва” адзначана Падзякай Магілёўскага аблвыканкама.

Ніна ВІКТОРЧЫК.

n.viktorchik@gzt-akray.by