Перыяд дзеяння штогадовай 50-працэнтнай зніжкі на праезд для пенсіянераў падоўжаны па 31 кастрычніка з улікам зваротаў грамадзян — адпаведны ўказ Кіраўнік дзяржавы падпісаў у панядзелак. Раней права на зніжку для грамадзян, якія дасягнулі агульнаўстаноўленага пенсіённага ўзросту і якім прызначана дзяржаўная пенсія незалежна ад яе віду, дзейнічала па 30 верасня.

Раённая круглагадовая спартакіяда сярод арганізацый і прадпрыемстваў стартуе заўтра ў 11 гадзін на стадыёне “Алімпіец”, дзе прадстаўнікі працоўных калектываў паспаборнічаюць у лёгкай атлетыцы, баскетболе, стральбе з пнеўматычнай вінтоўкі, гіравым спорце.

У фізкультурна-аздараўленчым комплексе “Жамчужына” ў сувязі з планавым адключэннем гарачага водазабеспячэння з 10 па 20 ліпеня не будуць працаваць басейн, аквазона і саўна. Да канца месяца прыпыніў працу і басейн “Дэльфін”: тут праводзяцца прафілактычныя работы.

На віртуальную выставу фотаздымкаў “Как будто в детство давнее ведут меня они…” запрашае раённы гісторыка-краязнаўчы музей. На здымках, самы даўні з якіх датаваны канцом ХIХ стагоддзя, адлюстраваны вуліцы, паркі, плошчы нашага горада і, вядома ж, гараджане. Цікава ведаць, як выглядалі Асіповічы і землякі ў мінулым стагоддзі? Фотавыстава даступна па 31 ліпеня.

Праект па стварэнні безбар’ернага асяроддзя “Даступны спорт” распрацаваны раённым цэнтрам сацабслугоўвання насельніцтва, паведамляе сайт аблвыканкама. Мэта праекта — стварэнне шматфункцыянальнай спартыўнай прасторы, адаптаванай для грамадзян з інваліднасцю, у тым ліку інвалідаў-калясачнікаў, для ўмацавання фізічнага здароўя і павышэння якасці жыцця людзей з абмежаванымі магчымасцямі.

Вынікі фотаконкурсу “Зямля пад белымі крыламі” падвядуць 15 ліпеня ў раённым цэнтры культуры і адпачынку. Тут у 17.30 пройдзе ўзнагароджанне пераможцаў і адкрыецца выстава работ.