Будуюць усё!

У гісторыі развіцця Асіповічаў бягучы год абавязкова зойме асаблівае месца, таму што ён “заточаны” пад важную канчатковую мэту. Нагадаем, што гэтай восенню плануецца правядзенне абласных “Дажынак”, а таму наш горад атрымаў карт-бланш на ажыццяўленне амбіцыёзнай праграмы па падцягванні да стандартаў ХХІ стагоддзя.

Наколькі паспяхова ідзе рэалізацыя задуманага? Чэрвень — гэта ўжо палова з адведзеных на “супербудоўлю” месяцаў, так што пытанне своечасовае.

Адзначым адразу — без карэкцыі не абышлося. З-за скарачэння фінансавання з абласнога бюджэту адкладзена на будучыню будаўніцтва новай аўтастанцыі, а сёлетняя праграма рамонту вуліц “палягчэла” з 2,8 мільёна рублёў да 1 мільёна. Шкада, але ад рэалій часу не схаваешся: у перыяд неспрыяльнай эпідэміялагічнай сітуацыі і звязаных з ёй эканамічных складанасцей пераразмеркаванне бюджэтных сродкаў — справа непазбежная.

У астатнім жа намеснік старшыні райвыканкама Аляксандр Ганчароў справамі задаволены. Па яго словах, ва ўсіх кірунках работы ідуць у адпаведнасці з устаноўленымі графікамі.

Жыллё

На гэты год запланавана пабудаваць тры шматкватэрныя дамы ў мікрараёне вуліцы Чарняхоўскага. Адзін 108-кватэрны будзе здадзены ў чэрвені. Другі такі ж зараз на этапе “нулявога цыкла”. На трэцім — ён меншы, на 72 кватэры — толькі рыхтуецца будпляцоўка. Але завершаны яны будуць амаль адначасова, у снежні.

Паралельна ідзе рамонт жылфонду. Капітальна аднаўляецца 20 шматпавярховак — гэта значна болей звычайнага. Ну а касметычны рамонт увогуле штосьці ўнікальнае, бо яго мэта — стварыць нашаму гораду выразны “твар”. Такой задачы раней не ставілася, і вынік чакаецца са зразумелым хваляваннем.

Вулічная інфраструктура

Тут многа ўсяго робіцца, таму абмяжуемся найбольш знакавымі аб’ектамі.

“Першая ластаўка” — рэканструкцыя Алеі Герояў — прыемна здзівіла хуткасцю выканання і прадуманай стылістыкай атрыманага выніку. Планка зададзена высокая, а месцаў грамадскага карыстання з блізкім статусам як мінімум яшчэ тры.

Сённяшні прыярытэт — сажалка ў гарадскім парку. Як яна будзе выглядаць, у цэлым ужо можна здагадацца, хаця работы тут яшчэ шмат. Нягледзячы на невялікія памеры, аб’ект няпросты. Напрыклад, у ім прадугледжана сістэма, якая будзе падтрымліваць памер акваторыі ў эстэтычна-прымальных межах незалежна ад вільготнасці надвор’я. Што слушна: галоўны вадаём горада павінен быць паўнаводным і без “дзікай” прыбярэжнай расліннасці.

Завяршэнне рамонту асфальтавага пакрыцця вуліцы Сумчанкі і рэканструкцыя плошчы Леніна пачнуцца ў ліпені, пасля правядзення тэндара.

Арыенціровачна месяцам пазней пачнецца рамонт праезду Чарняхоўскага — прынцыпова важнай для гэтага мікрараёна транспартнай артэрыі. Праект зараз праходзіць экспертызу, а ўсе далейшыя дзеянні “завязаны” на тэрмін завяршэння гэтай працяглай працэдуры.

Зроблена кім?

Дарэчы, пра тэндары, ці канкрэтней — іх удзельнікаў. Зараз у праграме будаўніцтва і добраўпарадкавання горада задзейнічана 10 арганізацый, у тым ліку тры прыватныя фірмы. Канкурэнцыя за падрады жорсткая: запытаў на ўдзел у кожным тэндары паступае да 16, рэальных прапаноў — у сярэднім па 5, а ў тэндары на правядзенне рамонту будынка цэнтра творчасці “біліся” ажно 8 прэтэндэнтаў.

Пры такой канкурэнцыі заказчык — Упраўленне капітальнага будаўніцтва — можа выбіраць найбольш выгадныя варыянты не толькі па цане, але і па іншых паказчыках, сярод якіх важкае месца займае дзелавая рэпутацыя прэтэндэнта.

Апошняя сёння мае вялікае значэнне. Асіпаўчане шчыра спадзяюцца, што зробленае сёлета не страціць свайго функцыяналу і вонкавага выгляду максімальна доўга. Такія надзеі павінны спраўдзіцца і, як сведчаць ужо дасягнутыя вынікі, памылак у выбары падрадных арганізацый не дапускаецца.