Спорт як жыццё

Здаровы лад жыцця, фізкультура, аматарскі і прафесійны спорт — усё гэта ў той ці іншай ступені прысутнічае ў жыцці кожнага жыхара Асіповіччыны. Адзін з важнейшых напрамкаў сацыяльнай палітыкі краіны падтрымліваем на выдатна!

Некалькі трэнажорных залаў з дастаткова якасным і запатрабаваным абсталяваннем, залы і пляцоўкі для футбола, валейбола, баскетбола, гімнастыкі і аэробікі, тэнісны корт, комплексы турнікоў і брусоў для варкаўта, хакейныя каробкі, басейны для спартыўнага плавання, дзіцячая і дарослая аквазоны — усё гэта і іншае ёсць на базе трох асноўных спартыўных устаноў Асіповіччыны. Так, фізкультурныя паслугі дарослым і дзецям прапануюць ФСК “Олимпия”, у склад якой уваходзіць і комплекс “Жемчужина”, раённы цэнтр фізічнай падрыхтоўкі з басейнам “Дельфин” і ШШК “Дебют” і дзіцяча-юнацкая спартыўная школа. Пастаянную работу з пачынаючымі турыстамі і краязнаўцамі вядуць педагогі дадатковай адукацыі турысцка-экскурсійнага аддзела ЦТДіМ.

Візітная картка Асіповіцкага раёна — міжнародны марафон, які ўжо больш за 30 гадоў збірае стаераў з усіх куткоў краіны і бліжняга замежжа. На базе комплексу “Юность” праводзяцца рэспубліканскія спаборніцтвы па тайландскім боксе, гіравым спорце, шахматах. На кросавай трасе каля паліклінікі зноў сталі праводзіць мотаспаборніцтвы, якімі калісьці славіліся  Асіповічы. Прымалі на тэрыторыі раёна і аматараў паездак на квадрацыклах па перасечанай мясцовасці: трофі-рэйды “Брудамесы”.

Амаль тры дзесяцігоддзі існуе прафесійны футбольны клуб “Асіповічы”: каманда выступае ў трэцім дывізіёне чэмпіянату Беларусі. Да слова, прыхільнікаў гульні з мячом у Асіповічах увогуле шмат. Так, зімой яны змагаюцца на першынстве раёна па міні-футболе сярод аматарскіх каманд, летам — чэмпіянаце Асіповіччыны па футболе, прымаюць удзел у аднадзённым марафоне “Чэмпіёны двара”, актыўна праводзяць таварыскія сустрэчы. А аддзяленне футбола ў ДЮСШ — самае шматлікае.

Што ўжо казаць пра прыхільнікаў веласпорту, бегу, фітнэсу і ёгі, заняткаў на вулічных турніках і трэнажорах? Іх шмат! Вось толькі, на жаль, вірус і пандэмія сур’ёзна скарэкціравалі планы і дзейнасць у тым ліку і мясцовых прыхільнікаў фізкультуры і спорту ў сезоне-2020. Але ж, спадзяёмся, у хуткім часе сітуацыя стабілізуецца. І спорт зноў ажыве!