Самы каштоўны скарб

Май. Квецень садоў. Спеў птушак. Сакавітая зеляніна. Усё гэта — яе вялікасць Вясна. Менавіта такой прыгожай парой і адзначаецца свята, якое тычыцца кожнага, — сям’і. Спагада, дабрыня, чуласць — усе гэтыя якасці нараджаюцца ў нас менавіта ў акружэнні родных і блізкіх. І не трэба быць вялікім псіхолагам, каб адчуць цеплыню і шчырасць, якія пануюць ва ўзаемаадносінах дамачадцаў, убачыць святло ў вачах і ўсмешкі на вуснах, далучыцца да нечага вялікага і пакуль што неспазнанага…

Вясёлыя, гаманкія, прыгожыя — такімі сустрэлі журналістаў “раёнкі” дзеці і дарослыя, што жывуць пад адным дахам у вялікім доме па вуліцы Народнай у аграгарадку Свіслач. Гэта дружная сям’я Вольгі і Андрэя Клепчаў. Гаспадар — настаяцель мясцовага Свята-Мікольскага храма, гаспадыня — настаўніца сярэдняй школы. Іх сямейнаму саюзу — 17 гадоў. За гэты час многае адбылося, але самае галоўнае — з’явіліся на свет пяцёра цудоўных дзяцей, якія штодня радуюць бацькоў звонкім смехам і пяшчотным шчабятаннем. Дарэчы, старэйшая дачка Кацярына — першакурсніца Гродзенскага музычнага каледжа. Аб’ядноўвае ўсіх агульная вера, якая дапамагае ў вырашэнні розных жыццёвых момантаў. Наогул жа, лічаць Клепчы, сям’я — гэта непарыўная сумесная творчасць, сямейнае шчасце нікому не даецца проста так. Над гэтым трэба пастаянна і многа працаваць — разам.

Ніна ВІКТОРЧЫК.

n.viktorchik@gzt-akray.by