Добры настрой і ажыўленне пануюць зараз на
Асіповіцкім вытворчым участку ААТ “Бабруйскі камбінат хлебапрадуктаў”: жніво ў
разгары, на прадпрыемства з трох раёнаў штодня “сцякаецца” каля 1.000 тон
зерня. Зразумела, што ў першую чаргу перад сельгаспрадпрыемствамі стаіць задача
выканаць дзяржаўны заказ. Сёлета для Асіповіччыны ён складае 4.350 тон зерня,
1.700 — рапсу, і апошні ўжо цалкам выкананы. Добрымі тэмпамі ідзе здача жыта —
на КХП дастаўлена 1.880 тон — 70% да неабходнага, пшаніцы прынята 87% — 743
тоны. Час іншых культур яшчэ наперадзе.

Прыёмка зерня адбываецца зладжана, тэхнічная
база вытворчага ўчаст-ка падрыхтавана да перыяду інтэнсіўных работ даўно. Адно,
што замінае бесперапыннаму падвозу хлеба, — недастатковая колькасць машын. 5
адзінак выдзеліў аўтапарк-19, 3 машыны свае, астатнія — з гаспадарак. Не хапае
транспарту ад ААТ “Асіповічыаграпрамтэхзабеспячэнне” і іншых арганізацый, якія
звычайна камандзіравалі свае машыны для перавозкі зерня. У астатнім жа ніякіх
замінак.

— Якасцю сёлетняга хлеба задаволены, — дзеліцца
начальнік вытворча-тэхналагічнай лабараторыі Валянціна Шляхціна. — Надвор’е
стаіць добрае, таму зерне мае невысокую вільготнасць — 14-15% пры дапусцімай
мяжы ў 19%. Уся пшаніца, якая паступае з асіповіцкіх палёў, мае высокае
ўтрыманне клейкавіны, адпавядае параметрам харчовай.

Першай гаспадаркай, якая прывезла здаваць хлеб у
засекі краіны, быў СВК “Калгас “Лапічы”. Тут, дарэчы, усе азімыя ўрадзілі на
славу. Пшаніца, напрыклад, дала 46,6 цэнтнера з гектара, жыта — 42,7.

Добрая выспела пшані-ца ў “Бярэзіне” — 47,8
цэнтнера на круг, “Чырвоным ударніку” — 44,8. Важкі колас мае жыта ў
“Авангардзе” — 40,6 цэнтнера з гектара, калгасе імя Чарняхоўскага — 40,2.

Усяго ж на ўчарашнюю раніцу па раёне ўбрана
палова ніў з новым хлебам, намалочана больш за 16 тысяч тон зерня.
Ура-джайнасць? Пакуль маем 35,2 цэнтнера з гектара, што адчувальна перакрывае
леташнія паказчыкі.

Валянціна КОРБАЛЬ.