Магазін № 14 «У дороги” ААТ «Гандаль” мае
нядрэнныя вытворчыя паказчыкі. Так, рост тавараабароту за студзень-чэрвень
склаў 349,2 млн. рублёў — 114% да адпаведнага перыяду мінулага года. Выручка на
1 работніка за I паўгоддзе — 58,2 млн. рублёў, у чэрвені — 82 мільёны.

Па словах загадчыка Ганны Ціханчук, такіх
вынікаў удалося дасягнуць, дзякуючы зладжанай рабоце. Ды і крама знаходзіцца ў
бойкім месцы, дзе спыняецца багата машын.

Пасля праведзенага рамонту знешні выгляд крамы
стаў асабліва прыглядным. Гандлёвая зала хоць і не надта вялікая, але набыць
тут можна ўсе неабходныя прадукты. Зараз асаблівым попытам карыстаюцца
марожанае і халодныя напоі, для якіх усталяваны некалькі спецыяльных
халадзільных камер. Ад гарачыні выратоўвае кандыцыянер. Падабаецца пакупнікам і
прасторная стаянка, дзе можна спакойна пакінуць аўтамабіль.

Спажыўцоў абслугоўваюць прадаўцы, якія стаяць за
прылаўкам не адзін год. Гэта Святлана Гулевіч, Таццяна Варакса, Святлана
Царанкова, Алена Крыцкая і ветэран працы Алена Шачэк. «Залог поспеху
калектыву ў тым, што стараемся не падводзіць адзін аднаго, — гаворыць Ганна
Сяргееўна. — Наведвальнікаў сустракаем з усмешкай, задавальняем попыт
кожнага з іх. Рады, што пакупнік выбірае нашу гандлёвую кропку”.

Дарэчы, за дзень дзверы магазіна адчыняюць каля
тысячы чалавек. I пакідаюць яны яго ў добрым настроі.