Асіповіцкія гімназісты ведаюць шмат

Да такой высновы прыйшлі тэлегледачы канала БТ
Сёлета адбыўся трэці сезон тэлевіктарыны “Я знаю” для самых кемлівых вучняў 5-11 класаў краіны. Каб трапіць у праект, рабятам неабходна было прайсці адборачныя туры ў сваіх раёнах і абласцях. Пераможцаў абласных адбораў запрашалі на сталічную сцэну, дзе шоумэн Георгій Калдун задаваў ім пытанні з розных абласцей ведаў, і не толькі ў рамках школьнай праграмы. Каб паказаць добрыя вынікі, вельмі важна было мець агульную эрудыцыю, да-сведчанасць пра падзеі, што адбываюцца ў свеце, паказаць веданне гісторыі сваёй краіны і ўменне хутка прымаць рашэнні.
Прыемна, што сярод самых разумных школьнікаў аказаліся і два нашы гімназісты: пяцікласнік Сцяпан Быхаўцоў і вучань дзявятага класа Рыгор Піцуха. Абодва хлопчыкі выступілі даволі паспяхова і хоць не сталі пераможцамі ўзроставых гульняў, але па колькасці набраных балаў выйшлі ў суперфінал. А таму пасля серыі гульняў кожнаму з іх пашчасціла ў ліку дванаццаці самых дасведчаных аднагодкаў прыехаць у сталіцу ў другі раз, каб пазмагацца за абсалютнае першынство. І пытанні былі з разраду тых, для адказаў на якія патрэбны не толькі веды, але і эўрыстычныя здольнасці, уменне разважаць. Не з усімі маглі справіцца нават дарослыя.
Абодвух удзельнікаў суправаджаў настаўнік інфарматыкі Яўгеній Гарадзецкі, які дапамагаў рыхтавацца да конкурсу, псіхалагічна настройваў на гульню.
Педагог адзначае, што хлапчукі маюць адметныя фізіка-матэматычныя здольнасці, гэтым прадметам надзяляюць больш увагі, а ўсё ведаць на аднолькава высокім узроўні немагчыма, таму пытанні па мове, літаратуры і геаграфіі часам даваліся цяжэй.

І Грыша, і Сцяпан — удзельнікі прадметных алімпіяд, гэта таксама дапамагло паспяхова “шчоўкаць” пытанні і даваць абгрунтаваныя адказы вядучаму. А вось з чым было складана спраўляцца, дык гэта з уласнымі эмоцыямі. Асабліва калі адзін з двух удзельнікаў, якія мелі аднолькавую колькасць балаў, з-за хуткасці адказаў праходзіў у наступны тур, а для другога гульня заканчвалася. Грышу дапамог вопыт удзелу ў спаборніцтвах па тайскім боксе, дзе немалаважную ролю адыгрывае ўменне валодаць сабой.
Яўгеній Леанідавіч адзначае, што яго вучням вельмі спадабаўся праект “Я знаю”. Яны прывезлі не толькі дыпломы ўдзельнікаў суперфіналу, але і набылі першы карысны вопыт, які спатрэбіцца ў далейшай вучобе і жыцці. А яшчэ — чаго зусім не чакалі — вядомасць сярод школьнікаў горада. Многія аднагодкі пазнаюць, распытваюць пра здымкі на тэлебачанні. З’явіліся і новыя сябры з усёй краіны, з якімі рабяты падтрымліваюць сувязі.
Дарэчы, заўтра па БТ-1 пакажуць суперфінальную гульню дзевяцікласнікаў, у якой удзельнічаў і Рыгор Піцуха.