З шэрагу вынесеных для разгляду на чарговым
пасяджэнні райвыканкама пытанняў, якое прайшло 18 ліпеня пад началам старшыні
Пятра Шукаловіча з удзелам кіраўніка справамі Магілёўскага аблвыканкама Рыгора
Вароніна, не аднаму была нададзена асобная ўвага.

Аб выніках работы галін народнай гаспадаркі і
выкананні бюджэту раёна за I паўгоддзе падрабязна праінфармавалі першы намеснік
старшыні і начальнік фінансавага аддзела райвыканкама Васіль Пятроўскі і Ларыса
Белая. Па шэрагу пазіцый Асіповіччына выглядае няблага. Напрыклад,
рэнтабельнасць продажаў у сельгасарганізацыях за студзень-май склала 8,2%
(заданне — 3%); тэмп росту аб’ёму рознічнага тавараабароту праз усе каналы
рэалізацыі за паўгоддзе — 111,7% (107%); забяспечана выкананне прагнозных
тэмпаў росту экспарту тавараў і паслуг і ўсіх 43 нарматываў дзяржаўных
сацыяльных стандартаў; за кошт усіх крыніц фінансавання асвоена 544,9 млрд.
руб. інвестыцый у асноўны капітал, што адпавядае 135,1% да леташняга перыяду
пры гадавым заданні 120%; выкананы зацверджаны нарматыў суадносін запасаў
гатовай прадукцыі да сярэднямесячнага аб’ёму яе вытворчасці і заданне па росту
зарплаты; больш запланаванага вернута ў гаспадарчы абарот раней
невыкарыстоўваемых аб’ектаў раённай камунальнай уласнасці — 20 замест 17;
забяспечана гадавое выкананне па збору (нарыхтоўцы) і пастаўцы перапрацоўчым
прадпрыемствам палімерных адыходаў і 63% — шкла; створана 335 рабочых месцаў
(заданне на год — 670) і 15 камерцыйных арганізацый і г.д.

 Нармальна
выглядае раён і ў фінансавым плане. Бюджэт па даходах, да прыкладу, выкананы на
107%, звыш плана паступіла больш за 10,9 млрд. рублёў, а расходы
кансалідаванага бюджэту склалі 97,9% да ўдакладненага плана справаздачнага
перыяду і 50,4% — гадавога. Запазычанасці па падатковых плацяжах у бюджэт і
мэтавыя бюджэтныя фонды ў нас няма; дэбіторская запазычанасць павялічылася на
1.430,5 млн. рублёў, крэдыторская адсутнічае.

Аднак сказаць, што ўжо ўсё зроблена
па-максімуму, нельга. У прыватнасці, тэмп росту аб’ёмаў вытворчасці
сельгаспрадукцыі адпавядае толькі 102,8% пры гадавым заданні 105,2%. Паменшылі
рознічны тавараабарот ААТ “Гандаль” і райста. У эксплуатацыю ўведзена за лік
усіх крыніц фінансавання 22,5 тысячы квадратных метраў жылля — 78,9% да
паўгадавога задання. Не ўсюды выконваецца паказчык па энергазберажэнні; не
забяспечаны прагнозныя тэмпы росту экспарту тавараў; не радуе сальда знешняга
гандлю таварамі і выкарыстоўванне інвестыцый у асноўны капітал; у наяўнасці
зніжэнне рэнтабельнасці продажаў. Чыстыя страты па раёне — 21,8 млрд. руб. Пяць
арганізацый — СААТ “Дах”, ААТ “Асіповіцкі малочны камбінат”, СЗАТ “Асіповіцкі
вагонабудаўнічы завод”, УКДВП “Асіповічырамбуд” і ЗПВУП “Парфумерна-касметычная
фабрыка “Сонца” — атрымалі страты ў суме 47.871 млн. рублёў; тры з 13
арганізацый, якім райвыканкам давёў заданне па зніжэнні ўзроўню затрат — ААТ
“Асіповіцкі камбінат бытавога абслугоўвання”, КБМУП “Прамаграбуд” і СВК “Калгас
“Новы шлях” — не забяспечылі яго выкананне; дзве падведамасныя арганізацыі —
ААТ “Гандаль” і КБМУП “Прамаграбуд” — па стане на 1 красавіка прызнаны
неплацежа-здольнымі. Не ўсюды, асабліва на вёсцы, аператыўна ўцягваюцца ў
гаспадарчы абарот невыкарыстоўваемыя і неэфектыўна выкарыстоўваемыя аб’екты. Не
ўсе суб’екты гаспадарання належным чынам займаюцца зборам (нарыхтоўкай) і
пастаўкамі другаснай сыравіны і г.д.

Карацей, праблем па-ранейшаму хапае, а таму
старшыня райвыканкама і ўздымаў з тлумачэннем шляхоў выпраўлення сітуацыі і
далейшага развіцця не аднаго з кіраўнікоў калектываў, дзе ёсць праблемы. I гэта
таксама знайшло адлюстраванне ў прынятым членамі выканкама рашэння.

Пракурор раёна Аляксандр Канецкі праінфармаваў
аб ходзе выканання ў рэгіёне Дзяржпраграмы па барацьбе са злачыннасцю і
карупцыяй на 2010-2012 гады і адпаведных мерапрыемстваў райвыканкама. За
паўгоддзе ў нас выяўлена 6 злачынстваў карупцыйнай накіраванасці (9), усе — па
фактах раскрадання шляхам злоўжывання службовым становішчам (1), з якіх у 2
выпадках прыняты рашэнні аб адмове ва ўзбуджэнні крымінальных спраў з
пастаноўкай вінаватых на ўлік. Колькасць пасадавых асоб, якія здзейснілі
карупцыйныя злачынствы, 6 — удвая меней, чым за паўгоддзе летась. У суд раёна
пракуратурай накіравана адна адпаведная крымінальная справа (2). Факты
парушэння выканання заканадаўства, накіраванага на барацьбу з карупцыяй,
выяўлены ў ДУКВП “Райсэрвіс” і “Водаканал”, аддзеле культуры райвыканкама, за
што асобныя прыцягнуты да матэрыяльнай і дысцыплінарнай адказнасці ці вызвалены
ад займаемых пасад.

Шмат увагі было надзелена таксама разгляду хода
будаўніцтва ў раёне малочнатаварных ферм, рэканструкцыя якіх ідзе з прымяненнем
драўляных канструкцый. Па гэтаму надзвычай важнаму для рэгіёна пытанню раней
ужо не раз праводзіліся нарады, на якіх вызначаліся тэрміны работ на аб’ектах,
іх паслядоўнасць, дзейнасць гаспадарак і будаўнікоў у адзінай запрэжцы,
механізм атрымання крэдытных сродкаў на ўзвядзенне МТФ і г.д. Час ляціць
няўмольна, аднак і сёння яшчэ не ўсе праблемныя моманты вырашаны да канца. У
тым ліку і належнае забеспячэнне фронтам работ будаўнічых атрадаў, якія
працуюць у раёне. Вывад просты і зразумелы: падобнае — недаравальна, усе
пазіцыі павінны быць закрыты ў самы бліжэйшы час. I тычыцца гэта ўсіх — і
кіраўнікоў сельгаспрадпрыемстваў, і УКВП “Капітальнае будаўніцтва”, і падрадных
арганізацый.