Хай будзе важкім колас

Сёлета да вясенніх палявых работ гаспадаркі раёна прыступілі значна раней, чым заўсёды

Нашы хлебаробы першымі ў вобласці закончылі сяўбу ранніх яравых, чые пасевы занялі 1 121 гектар. Зараз аграрыі працягваюць засяваць палеткі іншымі сельскагаспадарчымі культурамі.

У прыватнасці, аграрыі ААТ “Асіповічыаграпрамтэхзабеспячэнне” ў суботу шчыравалі на адным з пратасевіцкіх палёў, куды і накіраваліся журналісты “раёнкі” разам з кіраўніком гаспадаркі Фёдарам Вараб’ём.

— Работы вядзём комплексна, — гаворыць аграрый, які аддаў працы на зямлі больш за 40 гадоў. — Уносім мінеральныя ўгнаенні пад азімыя. Падкармілі ўжо 200 гектараў сурэпіцы і працэнтаў 80 азімага жыта. На днях закончылі сяўбу яравой пшаніцы — яна размясцілася на 80 гектарах. На чарзе — ячмень. Працаваць з ім пачнём заўтра і, мяркую, што да выхадных засеем запланаваных 100 гектараў. Усяго ж у таварыстве 3 966 гектараў сельгасугоддзяў, у тым ліку кукурузы будзе 1 140.

На сяўбе заняты 9 механізатараў. Усе вопытныя земляробы, добра ведаюць тэхналагічны працэс, сочаць за тэхнікай, не дапускаюць прастояў. Адзін з іх — Анатолій Крот. Ён не першы год працуе на карысць роднага сельгаспрадпрыемства. Некалькі гадоў таму атрымаў новы энерганасычаны трактар. Падтрымлівае яго ў добрым стане, ды і нямецкую сеялку, якой ужо 13 гадоў, даглядае як асабістую. Удзень яму лёгка паддаецца палетак у         30-35 гектараў. І кантраляваць яго не абавязкова, бо спраўляецца з пастаўленай задачай заўсёды своечасова і якасна. Падвозіць насенне вопытны трактарыст Сяргей Гуркоў. За яго плячыма таксама немалы стаж работы. Наогул жа кожны працаўнік выдатна разумее, што веснавы дзень год корміць, таму і працуюць зладжана.

Ніна ВІКТОРЧЫК.

n.viktorchik@gzt-akray.by