Сацыяльнае абслугоўванне

Асіпаўчанкі Ніна Лук’янава і Альбіна Дамброўская разам пераадольваюць жыццёвыя цяжкасці

Ужо каля пяці гадоў яны пражываюць у адной кватэры, дзелячы пароўну радасць і смутак. Такія выпадкі сустракаюцца нячаста. Толькі жыццёвы вопыт і мудрасць гэтых людзей дапамаглі ім прыстасавацца да абставін і разам крочыць па жыцці, падстаўляючы адна адной плячо ў прамым і пераносным сэнсе. Гэта можа служыць прыкладам для многіх: бязвыхадных сітуацый не бывае.

Яшчэ на старым месцы жыхарства Ніне Аўрамаўне дапамагала па гаспадарцы Вольга Карчэўская, а потым яна прыняла на абслугоўванне абедзвюх жанчын. Вымые вокны, прыбярэ ў пакоях, даставіць прадукты харчавання і гаспадарчыя тавары. Нават у бальніцы наведвала сваіх падапечных часцей, чым іншыя дзеці бацькоў. Забяспечвала кнігамі з бібліятэкі і гасцінцамі.

“Гэта незвычайны чалавек. Цудоўная жанчына і матуля, цікавы суразмоўца, добразычлівы сацыяльны работнік”, — такімі словамі характарызуе сваю надзейную памочніцу Ніна Аўрамаўна. “Яна нам як родная”, — падтрымлівае кампаньёнку Альбіна Іосіфаўна.

З цеплынёй адгукаюцца бабулі і пра ўчастковага доктара Андрэя Шалаева, які заўсёды знойдзе час, каб выслухаць і падтрымаць. А лекі, якія ён выпісвае, у тэрмін дастаўляе Вольга Андрэеўна.

Зараз ва ўмовах складанай эпідэмічнай сітуацыі нагрузка на сацыяльных работнікаў павялічылася. Яны абслугоўваюць не толькі “сваіх” пенсіянераў, але і адзінокіх людзей сталага ўзросту, якія звяртаюцца ў РЦСАН. “Без дапамогі не застанецца ніхто, — запэўнівае Вольга. — Калі трэба, прынясём прадукты і лекі, пад- трымаем словам”.

— Да нас могуць звярнуцца адзінокія пенсіянеры з любой кропкі раёна, — расказвае загадчык аддзялення пярвічнага прыёму, аналізу, інфармавання і прагназавання РЦСАН Вольга Фёдарава. — Дзякуючы цеснаму ўзаема-дзеянню розных арганізацый пытанне хутка вырашаецца. У сельскіх населеных пунктах медработнікі дастаўляюць пажылым людзям лекавыя сродкі, валанцёры БРСМ выконваюць заказы ў горадзе. Працуюць сацыяльныя работнікі. Да нас можна звяртацца па тэлефонах 73-465 або 8 (029) 691-60-65. У суботу, як і ў буднія дні, гарачая лінія будзе працаваць з 8 да 18 гадзін, ня—дзелю — з 8 да 13. Так што пенсіянерам не трэба перажываць. Без самага неабходнага не застануцца.

Іна Заскевіч.

i.zaskevich@gzt-akray.by