“Пакрыху рухаемся наперад”

Дзейнасць перасовачнай механізаванай калоны № 95 “Водбуд”
адлюстравана ў яе назве: мабільная, добра аснашчана тэхнікай, ажыццяўляе
транспартныя і іншыя паслугі, займаецца водаадводам, будаўнічымі работамі…

Рабочыя працуюць не толькі на тэрыторыі раёна,
але і па ўсёй краіне. Напрыклад, будуюць новы меліярацыйны аб’ект у Горацкім
раёне. Тут умеюць знаходзіць заказчыкаў, многія работы выконваюцца на ўмовах
падраду. Даўняе супрацоўніцтва склалася з вайсковай часцю Вялікай Гарожы, дзе
зараз будуецца сховішча для боепрыпасаў, а таксама пляцоўкі для іх адкрытага
захоўвання, ажыццяўляецца капітальны рамонт гаражоў.

Прывялі ў належны стан дарогу на вуліцы
Шамякіна, зрабілі рамонт мемарыяльнага комплексу ў Расосе. Вядзецца пазбаўленне
ад драўнінна-хмызняковай расліннасці, абкошванне травы вакол дарог і пабудоў.

ПМК № 95 “Водбуд” удзельнічае ў
добраўпарадкаванні сельскіх населеных пунктаў. Зараз працуюць у Градзянцы —
займаюцца пахаваннем старых, непрыгодных для пражывання дамоў, былога будынка
фермы. Запланаваны аграмеліярацыйныя работы ў калгасе імя Чарняхоўскага.

— Па аб’ёму выкананых са студзеня па май работ
паказчык склаў 101% у суадносінах да аналагічнага перыяду мінулага года, —
аналізуе намеснік дырэктара па будаўніцтве Людміла Долгая. — Так што пакрышачку
рухаемся наперад. За 4 месяцы зарабілі 70 мільёнаў рублёў на грузаперавозках,
карыстаюцца попытам аўтапагрузчык “Амкадор”, 20-тонны МАЗ, дальнамер,
экскаватар. Прадукцыйнасць працы на прадпрыемстве складае 105%. За кошт яе
плануецца і павышэнне зарплаты.

Вельмі ўдзячныя мы сваім работнікам, якія даўно
і плённа працуюць. Гэта намеснік дырэктара па механізацыі Аляксандр Дрозд,
галоўны інжынер Сяргей Зур, начальнікі будаўнічага ўчастка, падсобнай
вытворчасці і майстэрняў Уладзімір Кур’яновіч, Алег Папоў і Мікалай Чарэсьеў,
вядучы інжынер Мікалай Васько, машыніст-бульдазерыст Сяргей Русачкоў, машыністы
экскаватара Пётр Васько і Леанід Гаўрыкаў, рабочы Канстанцін Федарэнчык,
машыніст аўтакрана Анатолій Долгі і многія другія.

Клапоцяцца на прадпрыемстве аб сваіх работніках,
арганізоўваюць пазнавальныя падарожжы, 
экскурсіі ў Мірскі замак, на Украіну, іншыя цікавыя мясціны. Ветэранаў
працы таксама не забываюць. Наведваюць, віншуюць са святамі, аказваюць дапамогу
тэхнікай. А яшчэ “водбудаўцы” сябруюць са спортам, што, безумоўна,
дапамагае ў працы. Нават прафесійнае свята — Дзень меліяратара — сустрэнуць не
за святочным сталом, а на стадыёне: менавіта ў гэты дзень назначаны раённыя
спаборніцтвы па розных відах спорту, а ПМК № 95 “Водбуд” паказвала
нядрэнныя вынікі. Так, сярод работнікаў прадпрыемстваў свайго холдынга Марыя
Дзятлава заняла 1 месца па шашках, а Людміла Долгая стала лепшай тэнісісткай.
Паважаюць працаўнікі гіравы спорт, лёгкую атлетыку. Будзем спадзявацца, што
найлепшыя вынікі ў рабоце і самыя высокія спартыўныя дасягненні яшчэ наперадзе!

Іна Заскевіч.