Летась раён заняў першае месца ў вобласці па
вырошчванні цукровых буракоў, і гэта гаворыць аб тым, што працаваць з дадзенай
культурай на Асіповіччыне ўмеюць. Аднак нельга адмаўляць і тое, што папоўніць
свае веды ў пэўным кірунку ніколі не бывае лішнім. І тут немалую карысць
прыносіць супрацоўніцтва з бельгійскай фірмай “SESVANDERHAVE”, чыё насенне
буракоў ужо не адзін год выкарыстоўваюць нашы сельгаспрадпрыемствы.

У мінулую пятніцу раён у чарговы раз наведаў
кіраўнік прадстаўніцтва фірмы Мікалай Русак, каб правесці на базе СВК “Калгас
“Авангард” “палявыя” заняткі з інжынерамі, аграномамі і механізатарамі
гаспадарак, якія задзейнічаны на сяўбе салодкіх караняплодаў. Спецыяліст
расказаў аб тэхнічных і агранамічных сакрэтах вырошчвання цукровых буракоў —
падрыхтоўцы глебы, унясенні розных удабрэнняў, пасадцы, падкормцы, абароне ад
пустазелля.

Штогод тэхналогіі вырошчвання становяцца ўсё
больш дасканалымі. Русак прапанаваў асіповіцкім аграрыям звярнуць увагу на
такія новыя гатункі, як “вердзі” — доля цукру ў гэтага гібрыда даходзіць да
20%, “скаўт”, які на землях Брэстчыны даў ураджайнасць каля 1.000 цэнтнераў з
гектара. Дарэчы, “здаваць экзамен” некаторыя гаспадаркі сталі ўжо ў выхадныя,
прыступіўшы да сяўбы буракоў.

А пасадзіць гэтай культуры плануецца сёлета каля
паўтары тысячы гектараў. Самыя значныя плошчы пад караняплоды адведзены ў
філіяле “Белшына-агра” ААТ “Белшына” — 600 гектараў, “Чырвоным ударніку” — 200,
“Каўгарскім” — 180. Перад сельгаспрадпрыемствамі стаіць задача атрымаць на круг
не менш за 600 цэнтнераў буракоў, і для гэтага давядзецца прыкласці нямала
шчырай працы.

Што тычыцца ходу сяўбы ранніх яравых зерневых і
зернебабовых, то на ўчарашнюю раніцу раён засеяў амаль палову — 45% ад
запланаваных плошчаў. 80% значыцца ў аператыўнай зводцы па СВК “Калгас імя
Чарняхоўскага”, больш за 60 — у “Лапічах”. Як падкрэсліла першы намеснік
началь-ніка райсельгасхарчу па раслінаводстве Ганна Яцко, многім гаспадаркам
варта ўзяць больш высокія тэмпы палявых работ.

Валянціна КОРБАЛЬ.