Нагоды ў насельніцтва завітаць у гэтую ўстанову
бываюць самыя розныя: занядужала жывёліна ў хляве або хатні гадаванец, пакусаў
сабака ці нават лясны насельнік (літаральна днямі мужчына з Убалацця стаў
ахвярай куніцы), патрабуецца ветагляд перад продажам кабанчыка на рынку, на
паляванні сабака пацярпеў ад дзіка…

Размова пра работу ветэрынарна-санітарнай
установы “Асіповіцкая райветстанцыя”, якая, дарэчы, па выніках 2011 года стала
лепшай на Магілёўшчыне. У яе структуру ўваходзяць райветстанцыя,
райветлабараторыя, гарадская ветэрынарная лячэбніца, лабараторыя
ветсанэкспертызы на рынку, дзве ўчастковыя ветлячэбніцы. Пералічыць шматлікія
функцыі, якія выконвае райветстанцыя, проста немагчыма — настолькі шырокі
спектр яе работы. А вось на самым цікавым можна спыніцца.

Зімою была праведзена вакцынацыя дзікай жывёлы.
Скажаце, якім чынам гэта можна зрабіць? Спецыяльныя планшэты з вакцынаю
раскладаюцца ў найбольш “папулярных” звярыных месцах. Мерапрыемства праводзілася
сумесна і за сродкі інспекцыі прыродных рэсурсаў і аховы навакольнага
асяроддзя. Як расказала галоўны ветурач раёна Ганна Алёхна (на здымку), якая
ўзначальвае ветстанцыю з 2008 года, нярэдка менавіта дзікія жывёлы нясуць
пагрозу, і яркі пры-клад таму — даволі складаны ў плане барацьбы з шаленствам
мінулы год. Апошнія даследаванні паказваюць, што патэнцыяльную рызыку ў
распаўсюджванні класічнай чумы свіней нясуць дзікі, якіх, дарэчы, у нашых лясах
водзіцца каля паўтары тысячы.

Значную частку работы райветстанцыі складае
аб-слугоўванне сельгаспрад-прыемстваў раёна, прычым не толькі тых, дзе няма
ветслужбы. У час наведвання ветстанцыі якраз сустрэліся з брыгадай, якая
ездзіла ў СВК “Калгас “Каўгарскі” браць кроў у кароў на лейкоз, і заадно
зрабіла там пробы на захворванне туберкулёзам. Дарэчы, усе гэтыя маніпуляцыі —
фізічна складаная работа: трэба пэўным чынам “зафіксаваць” кожную карову,
правільна ўзяць у яе аналіз. Калі рагуля хаця б наступіць на нагу, мала не
пакажацца, не кажучы ўжо пра іншыя неспадзяваныя “выбрыкі”. За адзін выезд
брыгада можа ўзяць некалькі соцень проб крыві, а такія рэйды бываюць амаль
штодня…

Аказвае дапамогу гаспадаркам ветстанцыя і ў
складанні рацыёнаў кармлення жывёлы. Так, комплексны біяхімічны аналіз крыві
выяўляе, якіх рэчываў не хапае. Даследуецца ў лабараторыі і корм. Рознабакова
збалансаваўшы “меню”, можна эфектыўна паправіць сітуацыю.

Ёсць у ветстанцыі і свая доследная гаспадарка:
марскія свінкі, крысы, трусы і баран. На гэтых жывёлах ставяцца дыягназы на
інфекцыйныя захворванні.

Якія змяненні чакаюцца тут у бліжэйшы час? З
абласнога бюджэту выдзелена 400 мільёнаў рублёў на набыццё аўтамабіля ДУК —
дэзустаноўкі Камарова, а з раённага — 69 мільёнаў на легкавую спецмашыну.
Дадатковыя тэхнічныя магчымасці дазволяць функцыянаваць на новым якасным
узроўні.

Хоць работа ў ветслужбы нялёгкая, але цікавая —
інакш моладзь не заставалася б пасля абавязковага тэрміну адпрацоўкі. Нямала
тут людзей, якія аддалі ветстанцыі не адзін дзясятак гадоў: ветсанітар Таццяна
Гара-дзецкая, вядучы ветурач-серолаг Людміла Быліна, намеснік галоўнага вет-урача
Мікалай Масюкоў, загадчыца лабараторыі ветсанэкспертызы Зоя Масюкова, ветурач
Валянціна Кулакоўская, лабарант Галіна Малец. Старанна назапашаныя веды
беражліва захоўваюцца і перадаюцца маладым супрацоўнікам. А нядаўна калектыў з
энтузіязмам прыступіў да ажыццяўлення прапановы свайго начальніка Ганны
Віктараўны напісаць летапіс установы. Думаецца, у ім будзе шмат слаўных
старонак.

Валянціна КОРБАЛЬ.