У перапісе насельніцтва ўжо паўдзельнічалі 45% жыхароў раёна (па даных на 17 кастрычніка — 21051 чалавек), у тым ліку 29% праз інтэрнэт. Дарэчы, сёння апошні дзень інтэрнэт-перапісу — скарыстайцеся новай і цікавай магчымасцю!

Падчас правядзення акцыі “За безопасность вместе!”, як паведамілі пажарныя-ратавальнікі, кожны грамадзянін можа звярнуцца ў райаддзел па надзвычайных сітуацыях і дамовіцца аб правядзенні абследавання супрацьпажарнага стану свайго дома ці кватэры. Інспектары заклікаюць звярнуць увагу на знаёмых, суседзей, якія вядуць асацыяльны лад жыцця. Калі іх дзеянні пагражаюць бяспецы, не заставацца ўбаку, а паведаміць аб гэтым праваахоўнікам або ў пажарную службу.

12800 тон прадукцыі выпушчана за студзень-верасень працаўнікамі Асіповіцкага вытворчага ўчастка ААТ “Бабруйскі КХП”: 3200 тон мукі пшанічнай, 3900 — жытнёвай, 3300 аўсяных крупаў, 1300 — пярловых, 1100 — ячных. Рэалізацыя склала 99,2%. Трэць прадукцыі экспартавана ва Украіну, Расійскую Федэрацыю і Сербію.

У трэцяй гульні асенняй серыі “Што? Дзе? Калі?”, якая адбылася 11 кастрычніка, у чарговы раз ваўчок указаў на ліст нашай зямлячкі Вольгі Куцік. Яе пытанне было прызнана лепшым.

Сацыяльна-адукацыйны праект “Першыя” — конкурс яскравых ідэй, далучыцца да якога могуць вучні 9-11-х класаў. На працягу года ўдзельнікі праекта будуць распрацоўваць сваю ідэю, развіваць навыкі публічнага выступлення і самапрэзентацыі. 10 фіналістаў выступяць на маштабнай маладзёжнай канферэнцыі TEDxYouth@Minsk.

Рэалізацыя насення, як паведамілі ў райдзяржінспекцыі па насенняводстве, каранціне і ахове раслін, дапускаецца толькі пры наяўнасці дзеючага дакумента аб яго якасці, а насенне сельскагаспадарчых раслін павінна належаць да гатункаў, уключаных у дзяржаўны рэестр. Адказнасць за парушэнне патрабаванняў заканадаўства, якое рэгулюе адносіны ў сферы вытворчасці, рэалізацыі альбо выкарыстання для пасеву насення, прадугледжана артыкулам 15.56 КаАП.