Ад пераважнай большасці асіповіцкіх суб’ектаў гаспадарання гэтае прад-прыемства адрозніваецца падкрэсленай шматвектарнасцю сваёй дзейнасці, чым крыху нагадвае сусветнавядомых прамысловых гігантаў Паўднёвай Карэі: “DAEWOO”, “LG”, “Samsung”. Зразумела, з далёкаўсходнімі мега-карпарацыямі нашым камунальнікам не цягацца, аднак узяты імі на ўзбраенне прынцып “не класці ўсе яйкі ў адзін кошык” прадэманстраваў свае перавагі і на рэгіянальным узроўні. Дзякуючы яму, “Водаканал” у значнай ступені здолеў мінімізаваць наступствы майскай дэвальвацыі рубля і іншых макраэканамічных катаклізмаў, якімі надоўга запомніцца год з парадкавым нумарам 2011.

 Але без страт усё ж не абышлося. Напружваючы ўсе сілы, летась калектыў выйшаў на гістарычны максімум па аб’ёмах выкананых работ і ўзроўні найбольш важных прагнозных паказчыкаў, ды толькі выніковая рэнтабельнасць гэтых намаганняў у сукупнасці склала ўсяго 0,8%. Такім чынам, сродкаў, якія можна было б пусціць на далейшае развіццё ўласнай матэрыяльнай базы, павышэнне заробку персаналу і іншыя неабходныя справы, у “Водаканала” напрыканцы года засталося зусім няшмат.

Адчувальна ўдарыў па прадпрыемству і ўваход Беларусі ў Мытны саюз: каля 50 найбольш кваліфікаваных спецыялістаў самых дэфіцытных спецыяльнасцей — кранаўшчыкі, вадзіцелі, плітачнікі — звольніліся і з’ехалі ў Расію. Што ж, людзей можна зразумець: іх работа там аплачваецца як мінімум у 5 разоў вышэй…

Тым не менш дырэктар Ігар Трацяк у надыходзячае “заўтра” глядзіць з рашучым настроем, а прагноз на 2012 год выказвае ёміста і пераканана: “Выжываць “Водаканал” не будзе — будзе жыць!”

Такая ацэнка перспектыў мае пад сабой дастаткова трывалы грунт. Па-першае, узгаданая вышэй дыверсіфікацыя вытворчасці дае камунальнікам аператыўную гнуткасць: не будуць ісці справы ў адным накірунку, можна сканцэнтраваць намаганні і рэсурсы ў іншым. Па-другое, за перыяд інтэнсіўнага развіцця, які доўжыўся цэлую пяцігодку, удалося набыць усю неабходную тэхніку і, што важна, цалкам за яе разлічыцца. Ну і галоўнае — за гэты ж час быў створаны трывалы калектыў з прафесіяналаў, якія ганарацца сваім месцам работы і выдатна разумеюць, што цяжкасці, з якімі сутыкнулася і іх прадпрыемства, і ўся наша краіна, лепш пераадольваць разам, а не паасобку. А значыць, ДУКВП “Водаканал” сапраўды мае ўсё неабходнае, каб глядзець у будучыню з цалкам абгрунтаванай упэўненасцю ва ўласных сілах.