СВК “Калгас “Новы шлях”

Тут узяты добры старт для ажыццяўлення
запланаванага на сёлета будаўніцтва. У Асаўку ўзводзіцца новая ферма, дзе ў
двух памяшканнях будзе ўтрымлівацца 545 галоў дойнага статка. Нарыхтавана ў
Каменіцкім лясніцтве і ўжо вывезена на пляцоўку 140 кубаметраў лесу. 25 кубоў
драўніны трэба паставіць у гэтым месяцы на РВУП “Завод газетной бумаги” ў
Шклоў, дзе з дошак будзе склеены брус. Гэты будматэрыял патрэбны для ўзвядзення
верхняга поясу, на якім ставяцца кроквы.

Паралельна вядзецца ў гаспадарцы і рамонт склада
мінеральных удабрэнняў — засталося толькі паднавіць дзверы.

СВК “Калгас “Чырвоны ўдарнік”

Адна з задач сельгаспрадпрыемства на 2012 год —
павелічэнне вытворчасці малака. І ўжо зараз ёсць падставы меркаваць, што
намечанае будзе ажыццёўлена. Так, летась тут атрымана на 90 цялят больш, чым за
2010 год. Расцёлы кароў дапамаглі справіцца з адставаннем і вярнуць ранейшыя
“малочныя” паказчыкі. У агульным кожны дзень тут атрымліваюць на 4-х
малочнатаварных фермах больш за 8 тон малака, рэалізацыя якога зараз складае
103% да мінулагодняга адпаведнага перыяду. Спецыяліс-ты гаспадаркі не
выключаюць, што аднаўленню былых рубяжоў спрыяе і камбікорм, выпушчаны на заказ
на ААТ “Бабруйскі камбінат хлебапрадуктаў”, якім тут кормяць жывёлу на працягу
апошніх тыдняў.

СВК “Калгас “Лапічы”

Рамонт тэхнікі — такая першачарговая задача
стаіць тут на парадку дня. Зараз у майстэрні знахо-дзіцца пасяўны агрэгат
АКПМ-6, для якога ўжо набыты запчасткі, вядзецца рамонт раскідальніка
мінеральных удабрэнняў, дыскаў для забараноўвання барознаў.

Нядаўна гаспадаркай куплены за ўласныя сродкі
МТЗ-82. Гэты трактар не такі магутны, як “Беларус”, аднак больш манёўраны і для
выканання некаторых работ проста неабходны. Для поўнага задавальнення тэхнічных
патрэб гаспадарка плануе з цягам часу і пры наяўнасці магчымасці набыць у
лізінг кормаўборачны камбайн, аўтапагрузчык “Амкадор”, сеялку для кукурузы, а
таксама культыватар АКШ-6.

Філіял “Белшына-агра” ААТ “Белшына”

Нядаўна тут узнікла добрая “завядзёнка”:
праводзіць са сваёй падшэфнай установай адукацыі — а гэта Свіслацкая сярэдняя
школа — спартыўныя спаборніцтвы. На канікулах прайшлі “Вясёлыя старты”, у якіх
удзельнічалі каманды вучняў, настаўнікаў і ўпершыню — спецыялістаў (пераважна
вет-урачы і заатэхнікі) філіяла “Белшына-агра”. І хоць прадстаўнікі
сельгаспрадпрыемства не сталі пераможцамі ў шматлікіх спартыўных выпрабаваннях,
аднак спаборніцтвамі засталіся вельмі задаволены. Тым больш, што прызы і
дыпломы ад гаспадаркі атрымала кожная каманда. Ужо ў хуткім часе намячаецца
правесці першынство па валейболу.

Валянціна КОРБАЛЬ.