Калі
чуеш слова “эстрада”, амаль заўсёды ўяўляеш вялікія сталічныя
пляцоўкі, белазубых зорак, яскравыя шоу і натоўпы фанатаў. Але ўяўленне гэтае
крыху аднабаковае і стэрэатыпнае, бо сапраўдная эстрада мае быць не толькі ў
вялікім горадзе і горадзе ўвогуле. Таленавітыя выканаўцы ёсць, напрыклад, і ў
вёсцы Ліпень.

Народныя
калектывы ў наяўнасці амаль ва ўсіх клубах раёна. Ліпенскі СДК — не выключэнне,
гурт “Ліпенскія зоркі” існуе тут ужо 35 гадоў. А ў пачатку
90-х у Доме культуры з’явілася ўласная “фішка” — гурток эстраднай
песні “Равеснік”. Некалькі гадоў таму, калі ў калектыў прыйшлі
маладыя педагогі, ён значна змяніўся. Новымі кіраўнікамі вакальных гурткоў сталі
Наталля Язвінская і Алена Грышановіч, акампаніятарам — Вольга Струкава,
канцэртмайстрам — Крысціна Сяргеева.

Жадаючых займацца эстраднымі спевамі ў Ліпені
шмат. Прычым “Равеснік” рэгулярна наведваюць не толькі маладыя
дзяўчыны, але і жанчыны больш сталага ўзросту. У эстрадным гуртку займаюцца 12
чалавек, яны пастаянна рэпетыруюць, развучваюць новыя песні, складаюць праграмы
канцэртаў і, вядома, выступаюць. Педагогі падыходзяць да кожнага выканаўцы
індывідуальна, песні падбіраюцца ў адпаведнасці з магчымасцямі голасу і
характарам чалавека ўвогуле. Выкананне іх пад акампанемент баяна наўрад ці
слухалася і глядзелася б эфектна, таму кіраўнікі калектыву падбіраюць дзяўчатам
таксама і адпаведныя фанаграмы.

Удзельніцы “Равесніка” не толькі
спявачкі, але і самі сабе дызайнеры і візажысты — сцэнічны вобраз яны
прадумваюць самастойна.

 Таленавітыя выканаўцы, плюс прафесійныя
педагогі, плюс яркія нумары — у выніку нядзіўна, чаму на канцэртах гуртка
заўсёды шматлюдна. Без іх не абыходзіцца ні адно свята ў Ліпені, да таго, як
мінімум раз у месяц эстрадны калектыў дае выязныя канцэрты. Так, за апошні час
выступілі на Дні працаўнікоў сельскай гаспадаркі ў Лапічах, давалі канцэрты для
супрацоўнікаў міліцыі і вайскоўцаў, а ў асіповіцкай вы-праўленчай установе
адкрытага тыпу № 48 канцэрты “Равесніка” ўжо сталі традыцыйнымі.

Дарэчы, для некаторых удзельнікаў пеўчых і
танцавальных гурткоў Ліпенскі СДК становіцца стартавай пляцоўкай іх творчай
кар’еры. Так, выхаванка Дома культуры Вольга Галамака зараз ужо ўдзельніца
сталічнага рэспубліканскага студэнцскага хору “Ярыца”, а Ірына Джумахонава
— студэнтка Магілёўскага дзяржаўнага коледжа мастацтваў.

…Таленты ёсць усюды, і не абавязкова ехаць у
сталіцу, каб з імі сустрэцца.

 Таццяна
Ганчаронак.