РАУС

У перыяд з 28 лістапада па 4 снежня зарэгістравана
12 супрацьпраўных учынкаў, узбуджана 17 крымінальных спраў, раскрыта 3 раней
здзейсненыя злачынствы.

Скончыла жыццё самагубствам 57-гадовая жанчына.

Прыцягнуты да адказнасці жыхар в. Жорнаўка, які
ўцягнуў свайго непаўналетняга брата ў крадзеж маёмасці.

Узбуджана крымінальная справа ў адносінах 36-гадовага
асіпаўчаніна, які на працягу амаль двух месяцаў сістэматычна здзекаваўся са
свайго знаёмага-аднагодкі.

У перыяд з 27 па 29 лістапада быў узламаны
неахоўваемы магазін райста ў в. Майсеевічы. Зладзеі, асобы якіх пакуль
застаюцца невядомымі, скралі разнастайных прадуктаў харчавання, алкагольных
напояў і пральнага парашку «Мара” на суму каля 4 млн. руб.

ДАI

Спынена 126 парушэнняў правілаў руху, прыцягнуты
да адказнасці 4 п’яныя вадзіцелі, 17 парушальнікаў хуткаснага рэжыму і 32
пешаходы, якія не мелі на адзенні святлоадбіваючых элементаў. Адбылося 7 ДТЗ.

Раніцай 1 снежня на шашы Бярэзіна-Бабруйск
вадзіцель «Фольксвагена-Пасата” не справіўся з кіраваннем на закругленні дарогі
каля в. Чучча, ад чаго машына з’ехала ў кювет і перакулілася. Ад атрыманых цялесных
пашкоджанняў 54-гадовая пасажырка-бабруйчанка памерла ў Асіповіцкай ЦРБ праз 3
гадзіны пасля катастрофы.

Каля 19 гадзін 4 чысла аўтамабіль «БМВ-530” каля
Знаменкі збіў жыхара в. Вязаўніца, які выскачыў на праезную частку з-за
стаяўшага на прыпыначным пункце рэйсавага аўтобуса. Пацярпелы загінуў на
месцы.

Прыблізна ў той жа час на шашы Мінск-Гомель каля
пасёлка Сасновы «Сітраен С5” пры абгоне выехаў на сустрэчную паласу руху і
сутыкнуўся з матацыклам, які рушыў з выключанай фарай і габарытнымі ліхтарамі.
Кіраваўшы збітым матацыклам 26-гадовы жыхар Пухавіцкага раёна шпіталізаваны з
двума пераломамі левай нагі, ён на момант аварыі знаходзіўся ў стане цяжкай
алкагольнай інтаксікацыі.

АДАI нагадвае, што з 5 па 14 снежня праводзіцца
дэкада «Увага! Веласіпедыст!”, падчас якой будзе весціся асаблівы кантроль за
абсталяваннем веласіпедаў святлоадбіваючымі элементамі.

АУСТ

Затрымана 69 правапарушальнікаў, у ліку якіх
збегшы ад выплаты вялікага штрафу дзярждаўжнік. Узбуджаны крымінальныя справы
па фактах крадзяжу мабільнага тэлефона коштам 1,5 млн. руб. у пасажыра на
Асіповіцкім чыгуначным вакзале і хуліганства на станцыі Верайцы.

Дэпартамент аховы

Спынена дробных крадзяжоў — 6, выпадкаў распіцця
алкаголю альбо з’яўлення ў нецвярозым стане ў грамадскіх месцах — 8.

Медвыцвярэзнік

Дастаўлена 35 грамадзян, з якіх 12 адпушчана
пасля правядзення алкатэста і складання пратакола аб парушэнні антыалкагольнага
заканадаўства.

Незвычайным для ўстановы стала мінулая нядзеля:
за гэты дзень сюды не патрапіла ніводнага пацыента. За апошнія тры гады такое
«зацішша” зарэгістравана ўсяго ў другі раз.

РАНС

29 чысла па невядомай прычыне загарэўся жылы дом
у в. Ясень. Агнём пашкоджаны маёмасць, столь і падлога ў адным пакоі.

3 снежня з-за неасцярожнасці пры курэнні пачаўся
пажар у двухкватэрным жылым доме ў в. Градзянка.

IАЖіРС

Выяўлена 4 выпадкі парушэння правілаў
рыбалоўства. Па двух фактах — паўторнаму на працягу года браканьерству і
нанясенні прыродзе шкоды ў асабліва буйным памеры — матэрыялы перададзены ў
РАУС для ўзбуджэння крымінальных спраў.