«I як жыць зараз, калі грошай ні на што не хапае?”. У часы татальнага павышэння коштаў гэтае пытанне актуальнае як
ніколі. У кожнага свой адказ, які
грунтуецца на запатрабаваннях ды магчымасцях. Хтосьці пераходзіць на больш
лёгкі рэжым харчавання, вырашаючы, што самы час заняцца фігурай, іншыя
абмяжоўваюць сябе ў забавах, а некаторыя нават кідаюць курыць, эканомячы на
тытуні, кошт на які ўвесь час расце… Як у час непамерна высокіх коштаў і не
надта вялікіх заробкаў жывуць асіпаўчане? На чым эканомяць?

Наталля, 32 гады: “На харчаванне змяншаць
выдаткі даводзіцца. Пачалі ўжываць меней дарагіх прадуктаў. Калі катлеты,
напрыклад, рабілі з чыстага мяса, то цяпер — пераважна з батона ды бульбы.
Замяняем і іншыя кампаненты страў на больш танныя, камбінуем неяк… На здароўі
такая эканомія пакуль не адбіваецца. Адчуваем сябе добра ўсёй сям’ёй”.

Віктар, 29 гадоў: “Я курыць кінуў. Бо добрыя
цыгарэты вельмі дарагія зараз. Натуральна, гэта не вельмі значная эканомія, але
ж на праезд у гарадскім транспарце хапае”.

Марыя, 24 гады: “Эканоміць даводзіцца на многім.
Напрыклад, мая малодшая сястра вымушана была адмовіцца ад новага абутку на
зіму: я аддала свае боты, што набыла год таму. Сама больш старыя нашу. Добра,
што сучасная мода дазваляе апранаць усё. Ніхто не здагадаецца, калі абутак
набыты: сёлета, у мінулым годзе ці яшчэ раней”.

Ганна, 30 гадоў: “Ну як на чым? На ежы! Каб
адзін раз схадзіць у краму, трэба мець мінімум сто тысяч. І што можна на гэтыя
грошы купіць?.. Мой муж ужо гадоў пяць як вегетарыянец. Я і раней ведала, што
ягонае харчаванне абыходзіцца танней, чым маё і дачкі. А зараз і я паступова
адмаўляюся ад мяса: для нашай сям’і гэта раскоша. Праўда, дачку абмяжоўваць не магу:
ёй для роста трэба. Выкручваемся неяк…”

Васіль, 18 гадоў: “Паколькі на харчаванні
наша   сям’я эканоміць не хоча: здароўе
даражэй за ўсё, то даводзіцца траціць менш грошай на забавы. Стаў радзей з
сябрамі ездзіць у мінскія клубы. Раней мы амаль кожныя выхадныя ганялі ў
сталіцу. Паколькі ў Асіповічах рабіць асабліва няма чаго, то цяпер часцей
сядзім дома, час ад часу ладзім своеасаблівыя спаборніцтвы па камп’ютарных
гульнях. Для гэтага фінансаў не трэба”.

Мікалай, 21 год: “Я на ўсім эканомлю! На ежы:
абмяжоўваю ўжыванне мяса і гародніны. На праездзе: добра, што шмат куды ў
Асіповічах можна дайсці пешшу, ды і дадатковая нагрузка для арганізма дае
карысць. На вопратцы: хацеў прыдбаць новую дублёнку, але данашу тую, што маю.
Спадзяюся, што хутка памяняю працу і буду атрымліваць большы заробак. Можа, і
эканоміць не давядзецца больш”.

Ася Паплаўская.