Мірнага неба, духмянага хлеба — так звычайна жадаюць
на розных урачыстасцях. Хлеб — адзін з сімвалаў шчасця і дабрабыту. Давайце ж і
пабываем на мясцовым прадпрыемстве, дзе гэты неабходны чалавеку па ўсіх
параметрах прадукт выпускаецца.

Адна з адметнасцей хлебазавода — асноўная вытворчая
работа тут адбываецца ноччу. Калі ўвесь горад спіць, асіповіцкія хлебапёкі
“калдуюць” над хлебам, каб ужо з раніцы ў магазіне пакупнік мог набыць свежую
прадукцыю.

Адначасова праца ў начную змену і адна з цяжкасцей
прадпрыемства: не кожны, нават самы энергічны, чалавек, а калі больш прыземлена
— арганізм, вытрымлівае такі графік. Але са 160 работнікаў, у якіх у працоўнай
кніжцы месцам працы “прапісаны” РДУВП “Асіповіцкі хлебазавод”, нямала і такіх,
якія аддалі яму не адзін дзясятак гадоў. Напрыклад, пекар хлебнай лініі Людміла
Запарожац робіць тут 32 гады, а слесар-рамонтнік Іван Кірдун яшчэ на 4 больш.

Начальнік вытворча-тэхналагічнай лабараторыі Наталля
Лёўкіна з задавальненнем пазнаёміла з прадпрыемствам. Зараз тут выпускаецца 33
віды хлебабулачных вырабаў. У сярэднім 25 найменняў штосуткі. “Палітра”
кандытарскай прапановы вы-глядае так: 20 відаў тортаў, 7 — пі-рожных, па 2 —
рулетаў і пернікаў, 4 — салодкасці мучныя. У аб’ёмным выражэнні хлебабулачных
вырабаў выпякаецца ў трох печах штодня да 11 тон, кандытарскіх — да 100
кілаграмаў. Засвоены на прадпрыемстве і такі спецыфічны прадукт, як мука
экс-трузіённая шырокага прызначэння — 8 тон у суткі. Яна ідзе як кампанент
сухой заваркі “каласок” — тэхналагічнай дабаўкі пры вытворчасці хлеба, якая
скарачае і аптымізуе гэты працэс. Прадаецца заваркі каля 10 тон у месяц. З
задавальненнем набываюць яе такія канцэрны, як “Магілёўхлебпрам”,
“Віцебскхлебпрам”, аналагічнае прадпрыемства ў Гродне і шматлікія райста па
прычыне таго, што прадукт асабліва мэтазгодна выкарыстоўваць у маленькіх
хлебапякарнях. Ды і рэнтабельнасць у экструзіённай мукі добрая. Менавіта мука і
замяшчальнік сухога малака трымаюць гэты паказчык зараз на ўзроўні 7%, тады як
хлебабулачныя вырабы даюць толькі 3,8. Вядома, чаму: хлеб павінен быць
даступным для кожнага, таму і кошт яго заўсёды застаецца прымальным.

Змена ў хлебапёкаў пачынаецца ў 8 гадзін вечара.
Першымі да справы прыступаюць цеставоды — яны замешваюць апару і цеста. Калі
“субстанцыя” выбрадзіць, а гэта 2,5-3 гадзіны, самы час дабавіць розныя
інгрэдыенты згодна з рэцэптурай — цукар, маргарын, сухое малако, разынкі,
ванілін і г.д. Пасля таго, як усё добра вымешваецца, наступае чарга машыністаў
цестараз-дзелачных машын. Спачатку цеста ідзе ў цестадзяліцель, потым — у
цестаакругліцель, форму прыдае цестазакатачная машына. Потым яно ставіцца для
расстойвання, і, урэшце, пекар перасаджвае загатоўкі ў печ. Прычым, калі трэба,
робіць наколы і надрэзы (так, не здзіўляйцеся, надрэзы на кожным батоне
“наносяцца” ўручную). У залежнасці ад масы вырабу выпякаецца ён 15-25 хвілін.
Усяго ж, каб атрымаць, напрыклад, батон, патрабуецца каля чатырох гадзін.

Найбольш працаёмкі працэс — вытворчасць
дробнаштучных вырабаў. Усякія пляцёнкі — таксама ручная работа. Зразумела, што
з хлебам працуюць адданыя сваёй справе людзі. Сёлета адзначана граматамі работа
машыністаў цестамясільных машын Вольгі Грышановіч і цестараздзелачных машын
Таццяны Цярэнцьевай, зменнага майстра Таццяны Кузьміч, кандытара Наталлі
Патапчык.

На заводзе працуюць 3 лініі: па вытворчасці батонаў
і подавага хлеба, фармавога хлеба і дробнаштучных булачных вырабаў. Асартымент
пастаянна абнаўляецца. Выпускаецца дыетычная і дыябетычная прадукцыя, а таксама
ўзбагачаная бэта-карацінам. Штомесяц з’яўляецца прыкладна 4 навінкі.

Калі параўнаць аб’ёмы хлебазавода, то колькасць
хлебабулачных вырабаў сёлета засталася на тым жа ўзроўні: за
студзень-кастрычнік выпушчана 2.863 тоны. А вось “кандытарка” значна ўзрасла:
52,4 тоны супраць 38,5 леташніх, у тым ліку тортаў і пірожных — 17,9 тоны
(16,5).

Больш прадукцыі стала рэалізавацца праз фірменны
гандаль. Хлебазавод мае тры свае кропкі: “Гарачы хлеб” побач з прадпрыемствам,
ларкі ў Пратасевічах і на мясцовым рынку. Сёлета ўжо рэалізавана 56,7 тоны
(49,8) хлеба і 2.500 кілаграмаў (2.200) кандытарскіх вырабаў. Згодна з
патрабаваннем часу, больш стала паступаць у гандаль запакаваных хлебабулачных
вырабаў: 534 тоны (452), у тым ліку нарэзанага хлеба — 29 тон (летась за
адпаведны перыяд — 13).

Дарэчы, прадукцыю Асіповіцкага хлебазавода можна
набыць не толькі ў магазінах райцэнтра і ўсёй Асіповіччыны, але і ў Бабруйску,
і ў Мінску. І разыходзіцца яна нядрэнна!