У нашай краіне барацьба з гэтым небяспечным
захворваннем вядзецца даўно, аднак эфектыўнасць прымаемых мер усё ж цяжка
назваць высокай. Падставай для такой змрочнай высновы з’яўляецца адзначаемы
апошнім часам выбуховападобны рост колькасці хворых жывёл. За студзень-верасень
шалёных кошак, сабак, кароў, ліс і іншых дамашніх ды лясных жыхароў стала амаль
на 80% больш, чым летась.

Па Магілёўскай вобласці сітуацыя складваецца
яшчэ больш напружана: зарэгістравана каля 220 выпадкаў шаленства сярод жывёл —
у 4 разы больш, чым за аналагічны мінулагодні перыяд. Найбольш небяспечнымі
з’яўляюцца Магілёўскі (24 выпадкі), Клімавіцкі (23), Шклоўскі (20), Бялыніцкі
(18) і Мсціслаўскі (16) раёны.

Асіповіччына, дзе на сёння пацверджана 7
выпадкаў страшнай інфекцыі, на першы погляд трымаецца далёка ад лідараў гэтага
трывожнага рэйтынгу, аднак сітуацыя можа змяніцца ў любы момант. Толькі за
другую палову кастрычніка на тэрыторыі раёна адзначыліся сваімі нетыповымі
паводзінамі 4 жывёлы. Сярод верагодных носьбітаў шаленства нават рэдкая ў нашых
мясцінах і звышасцярожная ў звычайных умовах рысь.

Надвячоркам 19 кастрычніка гэтая дзікая кошка
з’явілася на паўднёва-заходняй ускраіне Асіповіч (вул. Забалацкая) і
“разабралася” з паўдзясяткам курэй, пасля чаго схавалася ў
гаспадарчай пабудове адной з сядзіб. Там у хуткім часе яна была забіта егерам
БТПР. Лабараторныя даследаванні дыягназ “шаленства” адразу не пацвердзілі,
аднак канчатковы вынік будзе атрыманы толькі праз месяц. Зразумела, у дадзеным
выпадку неабходныя меры прафілактыкі будуць ужывацца ўсё роўна — шаленства не
тая хвароба, якой можна пакідаць хоць мінімальны шанц.

А вось у вёсцы Слопішча з’яўленне нетыпова
агрэсіўнай куніцы яскрава прадэманстравала, наколькі несур’ёзна нашы землякі
часам адносяцца да пагрозы заражэння. 21 кастрычніка маленькая драпежніца
пакусала сабаку і мясцовага жыхара, пасля чаго была забіта палкай. Сусед
пацярпелага ўзяў цела куніцы голымі рукамі, маючы намер вынесці яго на сметнік,
але не данёс — яшчэ адзін вясковец вырашыў зняць з яе “каштоўную” скуру…

Лабараторныя даследаванні пацвердзілі шаленства
куніцы, таму легкадумных вяскоўцаў чакае доўгі курс прафілактычнага лячэння.

Зміцер КАЛЯДА.