“Вышыўкай можна расквеціць не толькі адзенне ці
прадметы побыту, але і свой унутраны свет”, — лічыць асіпаўчанка Надзея
Волкава. Захапленне гэтае прыйшло да яе яшчэ ў дзяцінстве, са школьных урокаў.
Больш таго, яно адыграла вялікую ролю ў выбары прафесіі. Надзея Міхайлаўна
скончыла Мазырскі педагагічны інстытут, вучылася там на факультэце “Абслугоўваючая
праца і выяўленчае мастацтва” і ўжо 13 гадоў выкладае працоўнае навучанне ў
Асіповіцкай спецшколе-інтэрнаце.

За гады работы пераканалася, што вышыўка мае
шматбаковы станоўчы ўплыў на развіццё дзіцяці, тым больш хворага. Арудуючы
іголкай, развіваеш маторыку дробных мышцаў рук, што, у сваю чаргу, спрыяе нават
інтэлектуальным здольнасцям. Спалучэнне розных тэхнік, арнаментаў, элементаў
узору развівае мастацкі густ, эстэтычнае ўспрыманне рэчаў. І яшчэ адзін важны
аргумент: праз вышыўку можна вывучаць гісторыю свайго народа. На першы погляд
можа здацца, што вышытыя геаметрычныя фігуры — проста аздабленне. Чалавек, які
цікавіцца гісторыяй, ведае пра сімвалізм гэтых знакаў. Напрыклад, крыжык —
перашкода і абарона ад зла, круг — сімвал урадлівасці і дастатку, квадрат, ромб
— сонца, спіраль сімвалізуе мудрасць, а трохвугольнік — самога чалавека і
чалавечыя зносіны…

А яшчэ гэты занятак да-зваляе настаўніцы быць
бліжэй да дзяцей. Так, калі ў маі выхаванцы спецшколы ездзілі ў Санкт-Пецярбург
на міжнародны конкурс “Крок насустрач”, дзе трэба было выступіць у спецыяльна падрыхтаваных
да гэтай падзеі сцэнічных касцюмах, Надзя цэлы месяц затраціла на тое, каб іх
выкраіць, пашыць і аздобіць вышыўкай. У выніку атрымалася вельмі добра, а дзеці
адчувалі падтрымку.

Больш за ўсё майстрысе падабаецца вышываць
мастацкія палотны. Яе дом упрыгожваюць такія шэдэўры, як “Поўдзень”, “Дотык”,
нацюрморт “Вішні” і іншыя. Колькі часу патрабуе вышываная карціна? Трэба
ўдзяляць ёй вольныя хвіліны прыблізна на працягу года. Не так хутка, але затое
надзвычай прыгожа і арыгінальна.

 Як
нараджаюцца ідэі? Нейкай адной крыніцы не існуе. Бывае, пэўныя сюжэты ўзнікаюць
самі. Часам не лішняе заглянуць у спецыяльную літаратуру. Надзея карыстаецца не
толькі прапановамі сучаснага друку накшталт часопіса “Ксюша”, але і вывучае
навуковыя выданні. А яшчэ настаўніца з радасцю дзеліцца сваім захапленнем з
выхаванцамі. Некаторыя дзяўчынкі ўжо пайшлі ў вялікае жыццё, узяўшы з сабою са
спецшколы разам з усім добрым, чаму іх тут навучылі, і любоў да рукадзелля. З
задавальненнем кладуць крыжыкі і шыўкі на палатно цяперашнія выхаванкі Вераніка
Пугач, Вольга Ціменка, Мая Шаркова.

Гэта ж так цікава — рабіць жыццё прыгожым!

Валянціна КОРБАЛЬ.

Даведка “АК”. Гісторыя ўзнікнення вышыўкі ўваходзіць у глыбіню вякоў, калі не было
яшчэ ні пісьменнасці, ні хрысціянскіх малітваў. У тую далёкую эпоху жанчыны
вышытым крыжыкам звярталіся да язычніцкіх багоў з просьбай абараніць іх і іх
блізкіх ад гора і розных напасцей. Вышыўка крыжыкам насіла сакральны сэнс.
Славяне вышывалі ў асноўным чырвонымі ніткамі па белым полі. “Распісвалі”
крыжыкам адзенне, абутак, прасціны, занавескі, ручнікі. Кожны ўзор, кожная
рысачка былі напоўнены пэўным зместам і неслі ў свет і богу асабістае пасланне.