В деревне Крынка открыли мост через Птичь
Дакладна ў тэрмін
Узвядзенне моста праз раку Пціч у вёсцы Крынка (гл. “АК” № 76 ад 9.10.2018 г. “Вёска і яе мост”) было скончана ў мінулую пятніцу — на 2 дні раней вызначанага тэрміну. Хуткасць работы ваенных будаўнікоў стала прыемным сюрпрызам мясцовым жыхарам, якія з-за адсутнасці пераправы мелі мноства нязручнасцей. Што ж тычыцца якасці, то пры належным доглядзе наступную рэканструкцыю трэба будзе рабіць не раней, чым праз 20 гадоў. А гэта — максімальны тэрмін эксплуатацыі драўляных мастоў падобнай канструкцыі!
Пунктам адліку азначанага перыяду часу можна лічыць 13 гадзін 22 кастрычніка, калі пасля ўрачыстага мітынгу з удзелам старшыні райсавета дэпутатаў Сяргея Сувеева, камандзіра 188 гвардзейскай інжынернай брыгады палкоўніка Валерыя Жураўлёва, начальніка аддзела ідэалагічнай работы, культуры і па справах моладзі райвыканкама Ірыны Раманчук, дырэктара УКП ЖКГ Дзмітрыя Кулакоўскага, народнага калектыву “Вяселле”, вучняў і настаўнікаў Дараганаўскай школы і, зразумела, мясцовых жыхароў па новым мосце праехалі першыя машыны і прайшлі ўсе жадаючыя…
Па словах старшыні выканкама Дараганаўскага сельсавета Тамары Валадзько, крынкаўцы зрабілі ўсё магчымае, каб вайскоўцы-будаўнікі адчувалі сябе ў камандзіроўцы як дома, і добраахвотна ўзялі на сябе ладную частку “тылавога забеспячэння вучэнняў” у плане падтрымання гігіены, зручнасці месц адпачынку, дапамогі ў прыгатаванні ежы. У знак удзячнасці за гасціннасць прыняць удзел у цырымоніі перарэзвання чырвонай стужкі была запрошана мясцовая жыхарка Ганна Маслава, побач з домам якой воіны-мостабудаўнікі размяшчалі сваю палявую стаянку.
Фота Дзмітрыя САЎРЫЦКАГА.
