Да новага навучальнага года засталося не так ужо і многа часу, таму бацькі пачалі актыўна наведваць гандлёвыя кропкі, каб купіць адзенне-абутак, канцылярскія тавары і іншую неабходную дробязь. У сваю чаргу і магазіны рознай формы ўласнасці паклапаціліся пра тое, каб на прылаўках быў увесь школьны асартымент, і спажыўцам не прыйшлося нервавацца з-за недахопу таго ці іншага тавару.

Ужо не першы год да паслуг пакупнікоў арганізоўваюцца і “Школьныя кірмашы”, якія дапамагаюць у зборах да 1 верасня. У суботу такі пашыраны продаж пачаў сваю работу і ў нашым горадзе. Ён развярнуўся на цэнтральнай плошчы і сабраў не адну сотню пакупнікоў, якія завіталі па швейныя вырабы, спартыўнае адзенне-абутак, партфелі, рукзакі і іншае.

— У кірмашы прынялі ўдзел каля дзясятка суб’ектаў гаспадарання, — гаворыць загадчык сектара гандлю і паслуг райвыканкама Таццяна Кандратовіч. — У іх ліку Асіповіцкі філіял ААТ “Магілёўсаюздрук”, “Гандаль”, райспажыўтаварства, індывідуальныя прадпрымальнікі і рамеснікі. У сярэднім, каб падрыхтаваць да навучальнага года вучня пачатковых класаў, бацькам трэба мець у кашальку ад 145 да 750 рублёў, старшакласніка — ад 214 да 890. Кошт тавараў на школьных базарах вар’іруецца прыкладна ў такіх жа цэнавых дыяпазонах, што і на рынку. Працуюць і палаткі з неабходнай для школьнікаў друкаванай прадукцыяй. Можна ў адным месцы купіць сшыткі, дзённікі, атласы, контурныя карты, ранцы, апрануць-абуць дзіця. Школьны базар працягне работу і 25 жніўня, так што варта наведаць цэнтральную плошчу і ў гэты дзень.

Ніна ВІКТОРЧЫК. Фота Марыі ТАЛЕЙКА.