Райаддзел па надзвычайных сітуацыях з 20 жніўня па 21 верасня з мэтай прыцягнення грамадскасці да праблемы траўматызму і гібелі дзяцей на пажарах правядзе прафілактычную акцыю “У цэнтры ўвагі — дзеці”, прымеркаваную да пачатку новага навучальнага года.

У ААТ “Лапічы” сёлета ўпершыню вырас добры ўраджай груш сартоў “беларуская позняя” і “дэсертная расашанская”. Апошняй ужо прададзена прыблізна тона і выручана каля 2 тысяч рублёў.

Мясцовым каледжам па 20 жніўня вядзецца прыём дакументаў для атрымання прафтэхадукацыі па такіх спецыяльнасцях, як повар, прадавец, швачка, цырульнік, слесар па рамонце сельгасмашын, трактарыст-машыніст, вадзіцель аўтамабіля катэгорыі С, электразваршчык ручной звар-кі, тынкоўшчык-маляр. Па дзвюх апошніх пададзена найменш заяў, а вось прафесіі слесара, трактарыста і вадзіцеля ў абітурыентаў папулярныя. Планавы набор — 108 чалавек. Ужо сталі навучэнцамі 25 маладых людзей, якія пажадалі стаць тэхнікамі-будаўнікамі.

Райарганізацыя грамадскага аб’яднання “Беларускае таварыства Чырвонага Крыжа” сумесна з райкамам прафсаюза работнікаў аграпрамысловага комплексу ў рамках рэспубліканскай акцыі “Спёка” перадалі ў “Асіповічыаграпрамтэхзабеспячэнне”, “Ясень-АГРА” і “Бярэзіна-Агра-Люкс” мінеральную і бутыляваную пітную ваду “Дарыда”, каб наталіць смагу ўдзельнікаў уборачнай кампаніі. На рахунку мясцовага таварыства Чырвонага Крыжа і яшчэ адна добрая справа — 60 медыцынскіх аптэчак атрымалі сельгаспрадпрыемствы падчас уборкі.

ДАI сумесна з “раёнкай” 14 жніўня правялі рэйд па папярэджванні ДТЗ, звязаных з невыкананнем правілаў дарожнага руху на вуліцах горада, у ходзе якога выяўлены адзін выпадак парушэння правілаў абгону.

Ліпенскім сельсаветам з пачатку года выдадзена сяльчанам звыш 400 даведак. Найбольш папулярная — даведка па месцы жыхарства (297 штук). У сувязі з рэалізацыяй сельгаспрадукцыі, вырашчанай у асабістай гаспадарцы, стала карыстацца попытам адпаведная даведка. Пасведчанні аб нараджэнні і смерці выпісаны 23 грамадзянам.