Дзень моладзі — свята актыўнасці, энтузіязму, весялосці. Кожны адзначае яго па-свойму: прымае ўдзел у масавых гуляннях, спаборнічае ў спартыўных баталіях, сустракаецца з сябрамі, заводзіць новыя знаёмствы, а хтосьці пабываў на фестывалі красак “Холі” або патанцаваў на святочнай дыскатэцы, што праходзілі ў суботу вечарам у парку. А вось шэраг маладых сем’яў, якія жывуць у аграгарадках і вёсках Асіповіччыны, вырашалі паўдзельнічаць у прымеркаваным да свята маладосці раённым конкурсе “Уладар сяла-2018”.

Надвор’е было занадта “падыходзячае”, але пахмурнасць і дождж не спужалі рашуча настроеныя на ўдзел і перамогу пары з дзецьмі. І нават балельшчыкі прыйшлі падтрымаць сваіх — яркі паказальнік таго, што галоўнае — жаданне, а надвор’е не перашкода.

У 11 гадзін раніцы ў парку ўжо была чутна музыка. Некалькі прывітальных слоў ад вядучых — конкурс пачынаецца! Натуральна, у першую чаргу ўсім патрэбна было пазнаёміцца. І калі журы ў складзе намесніка старшыні райвыканкама Ганны Землянухінай, першага сакратара райкама БРСМ Алены Надзеявец, намесніка дырэктара лясгаса Аркадзя Новікава і галоўных спецыялістаў аддзела ідэалагічнай работы, культуры і па справах моладзі і ўпраўлення сельскай гаспадаркі райвыканкама Ларысы Волкавай і Таццяны Васюціч прадставілі раней, то сем’ям прыйшлося расказваць пра сябе самастойна — у вершах, песнях, сцэнках. Дарэчы, на кожным з выступаючых быў народны строй, які вельмі гарманічна выглядаў на вясковай моладзі.

Наступны конкурс — кулінарны. На гэты раз яго вырашылі зрабіць паказальна-інтэрактыўным: непасрэдна на сцэне маладыя гаспадыні і нават адзін гаспадар пяклі бліны, якія мелі магчымасць паспрабаваць усе жадаючыя. Прадэманстравалі сваю ўдаласць і майстэрства сем’і і на наступных двух этапах: конкурсе дрывасекаў “Умелыя рукі” і эстафеце “Усе на старт”. А яшчэ на працягу ўсяго мерапрыемства на сцэне была арганізавана своеасаблівая выстава-конкурс “Гаспадар рамёстваў”, дзе ўдзельнікі прадстаўлялі свае таленты ў кулінарыі, рукадзеллі, мастацкай творчасці і г.д.

Паглядзець было на што: рыхтаваліся ўсе. Таму і без узнагарод не засталася ні адна сям’я. Асобныя падарункі атрымалі і дзеці, якіх на 6 сямей набралася аж паўтара дзясятка. Прэзенты і Дыпломы за ўдзел атрымалі Кацярына і Дзмітрый Грынько (Лапічы), Валянціна і Аляксандр Мядзведскія (Забалацце), Дар’я Саламыкіна і Арцём Раполаў (Краснае). Дыплом III ступені і грашовую падзяку ўручылі Марыне і Уладзіміру Шурахайлавым (Карытнае). Крышку не дацягнулі да перамогі і спыніліся на другім месцы Вераніка і Сямён Шчэрба (Дараганава) — самая маладая пара: абодвум усяго ледзь больш за 20 гадоў. А ганаровае званне “Уладары сяла-2018” па праве атрымалі Вольга і Сяргей Снігір з Ясеня (на здымку), якія ў свае 24 і 27 гадоў маюць ужо пяцёра дзетак. У сям’і ёсць неаднаразовы вопыт удзелу ў раённым конкурсе, цяпер яны сталі першымі і паедуць абараняць гонар раёна на абласным этапе конкурсу.

* * *

Дарэчы, у гэты ж дзень на пляцоўцы каля царквы па вул. Юбілейнай прайшлі адкрытыя спаборніцтвы па хуткасным манеўраванні на матацыкле. Удзельнічалі ў іх 13 выхаванцаў мясцовага Цэнтра творчасці дзяцей і моладзі, якія выступалі ў індывідуальным заліку. Сярод спартсменаў была адна дзяўчынка Дарына Мяцеліца (трэнер Уладзімір Баранаў), якая заняла пятае месца. Самы юны ўдзельнік 10-гадовы Цімафей Астрашэўскі (Аляксей Астрашэўскі) выйшаў на чацвёртае месца, другую і трэцюю прыступкі п’едэстала гонару занялі выхаванцы Міхаіла Брэля Раман Ліпніцкі і Аляксей Крыловіч. А пераможцай у адкрытых спаборніцтвах стаў Уладзіслаў Кандрацёнак (Уладзімір Баранаў).

Марыя ТАЛЕЙКА.

Фота аўтара.