Сотні старшакласнікаў Асіповіччыны — дакладная
колькасць будзе вядома ў верасні, калі школьнікі зноў сядуць за парты пасля
канікул — сёлета, у год прадпрымальнасці, вырашылі спалучыць летні адпачынак з
працай. I гэта ў многіх з поспехам рэалізоўваецца. Вось, напрыклад, Iлья Сугака
з Лапіцкай САШ атрымаў працоўнае месца ад Лапіцкага сельвыканкама. Хлопец
займаецца добраўпарадкаваннем тэрыторыі населеных пунктаў сельсавета. Асабліва
юнаку падабаецца касіць траву абапал дарог. Прыемна бачыць, як усё вакол
набывае акуратны выгляд. I вяскоўцы гэта таксама заўважаюць. А ў вольныя
хвіліны любіць юнак памарыць пра сваю будучыню — застаўся толькі год вучобы ў
школе, а далей — дарослае жыццё. Што ж, галоўнаму — ведаць цану працы — Iлья
ўжо навучыўся.

А Iгар Гізбрэхт і Саша Ніціеўскі, вучні гэтай жа
школы, вырашылі дапамагчы мясцоваму сельгаспрадпрыемству. Штораніцы зараз
хлопцаў можна бачыць на зернетаку СВК «Калгас «Лапічы”, куды звозіцца з
мясцовых ніў залатое багацце. Юнымі хлебаробамі заўважана: калі дзень
пачынаецца рана, то яго хапае не толькі на работу, але і на плённы адпачынак.
Асабліва ён прыемны, калі добра папрацуеш фізічна: маеш адчуванне ў душы, што
яшчэ адзін дзень пражыты з вялікай карысцю…

Валянціна КОРБАЛЬ.