Яшчэ некалькі пагодлівых дзянькоў, і гаспадаркі
Асіповіччыны завершаць работы на нівах. Аб выкананні дзяржзаказу і асаблівасцях
жніва-2011 расказвае першы намеснік начальніка райсельгасхарчу Ганна Яцко:

— Сёлетні дзяржзаказ складае 5.630 тон, што на
1.150 тон больш, чым летась: узрос запыт на жыта і ячмень. Добра спраўляліся з
пастаўкамі хлеба на Асіповіцкі вытворчы ўчастак ААТ “Бабруйскі камбінат
хлебапрадуктаў” калгасы “Ясень” — ужо выканаў заданне на 100%, “Бярэзіна”,
“Каўгарскі”. Наогул жа раён ужо здаў у засекі краіны больш за 85% ад
запланаванага.

— Сёлета ў зерневы клін была ўключана не зусім
звыклая для асіповіцкіх палёў культура — піваварны ячмень. Ці ўдалым аказаўся
праект?

— На жаль, пахваліцца тут не можам. Як паказала
практыка, нашы землі не вельмі спрыяльныя для вырошчвання гэтай культуры. Каб
ячмень урадзіў, трэба было ўнесці вялікую колькасць мінеральных удабрэнняў, у
тым ліку азотных. Але ж галоўная праблема для нас у якасці ячменнага зерня: для
выкарыстання ў піваварэнні яно павінна адпавядаць пэўным характарыстыкам. Па
ўсіх параметрах падышоў ячмень толькі з “Ясеня”. Пробы з іншых
сельгаспрадпрыемстваў паказалі празмернае ўтрыманне бялку — такая вось
атрымалася перашкода.

— Матэрыялы СМІ сведчаць, што краіна будзе з
добрым караваем. А які хлеб паспеў сёлета на Асіповіччыне?

— Кожны гектар урадзіў 32 з паловай цэнтнеры —
на 2,5 цэнтнера больш, чым летась. Добрую аддачу далі нівы ў “Лапічах” — 44,2
цэнтнера на круг (2010 год — 34,5), “Авангардзе” — 38,1 (35). Пакуль што ніжэй
за раённы ўзровень ураджайнасць у калгасе імя Чарняхоўскага, ААТ “Пратасевічы”
і “Асіповічыаграпрамтэхзабеспячэнні”.

— З-за дажджоў значная нагрузка лягла на
сушылкі. Як яны спраўляліся?

— Да пачатку сезона была зроблена рэканструкцыя
польскай сушылкі ў “Асіповічыаграпрамтэхзабеспячэнні”, калгасе “Каўгарскі”.
Зараз гэтыя агрэгаты працуюць на саломе. У належным стане ўстаноўкі і ў іншых
СВК. Дастаткова ў нашых сельгаспрад-прыемствах падлогавых сушылак. З-за таго,
што гэтыя сушылкі працуюць на вентыліраванні, без падключэння газу, былі
некаторыя праблемы з дапрацоўкай зерня на насенне ў “Авангардзе”

— Звыклая справа — аналізаваць вынікі,
падводзячы рысу пад зробленым. Што паказала жніво-2011?

— Лічу, што размеркаванне зерневага кліну для
нашага раёна аптымальнае. Вялікіх змяненняў у пасяўных плошчах на наступны год
не плануецца. Толькі вось варта перагледзець структуру зернебабовых: магчыма,
сеяць не з аўсом, а з пшаніцаю.

Што ж, прыйшла пара думаць пра наступны ўраджай.
Гаспадаркі прыступілі да сяўбы азімага рапсу…

Гутарыла Валянціна КОРБАЛЬ.