Дабрачынная навагодняя акцыя “Нашы дзеці”, якая стартавала яшчэ ў снежні, працягваецца. У ёй ужо прынялі ўдзел многія кіраўнікі прадпрыемстваў і арганізацый раёна, якія наведалі дзіцячыя ўстановы, бальніцы, апякунскія і прыёмныя сем’і і ўручылі рабятам падарункі.

У сераду да важнай і патрэбнай справы далучылася абласная асацыяцыя мясцовых Саветаў дэпутатаў, куды разам з іншымі народнымі выбраннікамі ўваходзяць і асіповіцкія дэпутаты. Па іх даручэнні ў аддзяленне дзённага знаходжання інвалідаў завітаў старшыня райсавета дэпутатаў Аляксандр Пузік, каб павіншаваць наведвальнікаў з Новым годам і Калядамі, а таксама ўручыць грашовы сертыфікат на 250 рублёў, які прыняла з яго рук дырэктар раённага цэнтра сацыяльнага абслугоўвання насельніцтва Ірына Вірмаўскене. А яшчэ з прафілактычнай гутаркай “Здаровыя зубы” перад прысутнымі выступіў загадчык стаматалагічнага аддзялення ААТ “Медыцынская ініцыятыва” ўрач Алег Грамовіч.

У адказ наведвальнікі аддзялення падрыхтавалі невялікую канцэртную праграму. А за кубкам гарбаты задавалі гасцям хвалюючыя пытанні, дзяліліся ўражаннямі ад многіх, ужо стаўшых леташнімі, мерапрыемстваў, зычылі адзін аднаму здароўя і душэўнай цеплыні.