“Цуды на Каляды” з БРСМ. Далучайцеся!
Час навагодніх свят і Калядаў без сумнення можна назваць самым незвычайным. Узвышаны, радасны настрой, падарункі, сустрэчы з сябрамі і роднымі — што можа быць лепей? А вось члены асіповіцкага РК ГА «БРСМ» знайшлі спосаб зрабіць гэты час не толькі вясёлым, але і карысным. З 11 снежня па 8 студзеня пад эгідай арганізацыі праводзіцца рэспубліканская дабрачынная акцыя “Цуды на Каляды”.
— Гэта акцыя даўно стала традыцыяй і ладзіцца ўжо дзясяты год запар, — расказвае першы сакратар раённай арганізацыі БРСМ Алена Надзеявец. — У час яе правядзення ўсе «пярвічкі» БРСМ у школах і на прадпрыемствах збіраюць канцылярскія тавары, ласункі, цацкі, якія пасля будуць прэзентаваныя дзецям з сямей, што апынуліся ў складанай жыццёвай сітуацыі. Акрамя гэтага, на працягу некалькіх апошніх гадоў традыцыйным стала і наведванне дзіцячага аддзялення раённай бальніцы. Там арганізоўваецца забаўляльна-гульнёвая праграма з Дзедам Марозам, Снягуркай і абавязковымі падарункамі маленькім пацыентам. Невыпадкова сімвалам мерапрыемства былі абраны чырвоныя рукавічкі, якія адлюстроў-ваюць імкненне дзяцей і моладзі краіны акружыць клопатам і ўвагай тых, хто мае ў гэтым асаблівую патрэбу.
Далучыцца да добрай справы і падзяліцца з дзецьмі кропелькай цяпла можа кожны жыхар горада і раёна. Для гэтага дастаткова прынесці свой падарунак у пункт прыёму, які знаходзіцца па адрасе: г. Асіповічы, вул. Сумчанкі, 33, каб. 309 (другі корпус райвыканкама). Дадатковую інфармацыю можна атрымаць па тэлефоне 66-105.
