Работников сельского хозяйства и перерабатывающей промышленности чествовали в РЦКиД
Урачыстае мерапрыемства з нагоды прафесійнага свята працаўнікоў сельскай гаспадаркі і перапрацоўчай прамысловасці АПК адбылося ў пятніцу ў раённым Цэнтры культуры і адпачынку. Святочная зала сабрала лепшых прадстаўнікоў галіны. Першым вітаў землякоў старшыня райвыканкама Павел Налівайка. Ён падкрэсліў важнасць працы тых, хто забяспечвае краіну якаснымі прадуктамі харчавання, расказаў аб дасягненнях і планах работнікаў АПК нашага краю. Кіраўнік раёна шчыра падзякаваў аграрыям за іх нялёгкія будні і ўручыў шэраг заслужаных узнагарод.
Павіншаваць асіповіцкіх хлебаробаў, жывёлаводаў і перапрацоўшчыкаў прыехаў і старшыня камітэта па сельскай гаспадарцы і харчаванні аблвыканкама Валерый Сямёнаў. Ён пажадаў плёну на нівах і фермах, сямейнага дабрабыту. Ганаровую грамату Міністэрства сельскай гаспадаркі і харчавання атрымаў вадзіцель філіяла “Белшына-агра” ААТ “Белшына” Пётр Юзін, Ганаровую грамату аблвыканкама — трактарыст-машыніст ААТ “Бярэзіна-Агра-Люкс” Віктар Кадчык, а Падзяку абласнога выканаўчага камітэта — брыгадзір вытворчай брыгады ў жывёлагадоўлі ААТ “Асіповічыаграпрамтэхзабеспячэнне” Леанід Дзятлаў. Ганаровымі граматамі аблсельгасхарчу адзначана праца трактарыста-машыніста гэтай жа гаспадаркі Аляксандра Iванова і галоўнага агранома ААТ “Каменічы” Генадзя Кашлача.
Далучыліся да віншаванняў і прафсаюзныя лідары Алена Паргачова і Святлана Сідарэнка. Узнагароды прафесійнага саюза атрымалі 7 чалавек.
Святочны настрой на сцэне стваралі сваімі яркімі, цікавымі і рознажанравымі нумарамі прафесійныя і самадзейныя артысты Асіповіччыны. I няхай душэўны ўздым суправаджае працаўнікоў аграпрамысловага комплексу заўсёды!
Фото Нины ЦАРИК.
