У якім стане знаходзіцца ваша печ ці кацёл? Ці маюць дзеці доступ да запалак? Шмат часу надаеце прафілактыцы ўзгаранняў? Такія пытанні павінен задаць сабе кожны. А як ідуць справы з супрацьпажарнай бяспекай у раёне? Расказвае начальнік райаддзела па надзвычайных сітуацыях Ігар ЛОГВІН:

– Не аднойчы ўжо казалі: лягчэй бяду папярэдзіць, чым потым спраўляцца з наступствамі. Але, нажаль, не заўсёды землякі карыстаюцца гэтым правілам, што часам прыводзіць да самых сумных вынікаў. Так, на працягу бягучага года адбылося ўжо 4 здарэнні, на якіх пагіблі людзі. Тры пажары такога кшталту зарэгістраваны ў вёсках Залессе, Лучыцы, Углата. Прычыны – парушэнне правіл эксплуатацыі пячнога атаплення і неасцярожнае абыходжанне з агнём… Яшчэ адна смерць – зусім нядаўна: ўзарваўся газавы кацёл, што пацягнула за сабой гібель 65-гадовага мужчыны.

Усяго за студзень-верасень 2017 года на Асіповіччыне адбылося 32 пажары, з якіх 10 – непасрэдна ў горадзе. І амаль усе – у жылым сектары. 2 земляка траўміраваны падчас надзвычайных здарэнняў (за аналагічны перыяд 2016 г. – 1), знішчана 10 збудаванняў і 2 адзінкі тэхнікі. Як у мінулым годзе, так і сёлета сярод прычын пажараў лідыруе неасцярожнае абыходжане з агнем – па 13 выпадкаў. Падводзяць людзей і пячное ацяпленне, і электрагаспадарка. Акрамя таго, за бягучы перыяд мы зарэгістравалі 5 узгаранняў, якія справакавала свавольства дзяцей з агнём, а ў мінулым годзе – толькі 1.

Як бачым, усё гэта – так званы чалавечы фактар. 2 пажары, звязаныя з праяўленнем сіл прыроды, здарыліся толькі ў 2016 годзе, але гэта хутчэй выключэнне. Канечне, правілаў пажарнай бяспекі шмат, асабліва зараз, у асенне-зімні ацяпляльны перыяд. Але ўсе яны цалкам выканальныя, нескладаныя і ўсім вядомыя. І ў чарговы раз рэкамендую ўсталяваць аўтаномныя пажарныя апавяшчальнікі – не аднойчы яны ратавалі жыццё, здароўе і маёмасць грамадзян.