Са сваімі чытачамі журналісты «АК» заўсёды сустракаюцца з задавальненнем: з любым чалавекам цікава пагутарыць. Асабліва з такім, як асіпаўчанка Наталля Варава, якая з нашым выданнем сябруе ўжо не адзін дзясятак гадоў, а нядаўна, выпісаўшы “Асіповіцкі край” на II паўгоддзе, стала ўладальніцай купона на бясплатнае віншаванне.

— Нават не ўяўляю, як можна абыходзіцца без мясцовай газеты, — разважае Наталля Рыгораўна. — Гэта ж галоўная крыніца навін у раёне! Асабліва для тых, хто не валодае інтэрнэтам. Сама родам з Цэзарова, з задавальненнем чытаю пра сваіх аднавяскоўцаў. Доўгі час адпрацавала на КХП і АЗАА, таму лёс гэтых прадпрыемстваў і людзей, якія там робяць, таксама хвалюе. На старонках “Асіповіцкага краю” ёсць інфармацыя, як кажуць, на любы густ. Нават 5-гадовы ўнучак Нікан, хоць яшчэ чытаць не ўмее, любіць “паглядзець карцінкі”.

Як распарадзіцца жанчына выйгрышным талонам? У хуткім часе адзін з сыноў адзначыць 30-гадовы юбілей, так што бонус якраз дарэчы.

Часты наведвальнік у сям’і Варава паштальён Таццяна Карчэўская. У аддзяленні сувязі   № 1 яна працуе ўжо дзявяты год. За гэты час дасканала авалодала справай і наладзіла добрыя ўзаемаадносіны са сваімі кліентамі, таму праблем з падпіскаю ў Таццяны Iванаўны няма. Яна не шкадуе часу, каб зайсці да чалавека ў хату, пацікавіцца справамі ды параіць якое-небудзь выданне ці тавар. Працаўніца заўсёды імкнецца даставіць карэспандэнцыю адрасату як мага раней. «Ведаю, што людзі чакаюць газеты, таму і спяшаюся», — просты, але важны аргумент прыводзіць паштальён. I такія адносіны выклікаюць толькі павагу.

У дзень падпісчыка, які нядаўна прайшоў ва ўсіх аддзяленнях паштовай сувязі Асіповіччыны, паўдзельнічала 185 землякоў. Дарэчы, найлепшыя паказчыкі атрымаліся якраз у гарадскога № 1. Два дзясяткі чалавек падпісала аддзяленне сувязі № 5, 13 абанементаў было аформлена на пошце ў Пратасевічах, 12 – у Вяззі. Шчыры дзякуй за плённую працу!

А вось у Градзянцы, Красным, Ялізаве, Цэлі, Ясені, Лапічах дзень падпісчыка эфекту практычна не прынёс. Калі шчыра, то найбольш здзіўляюць да-дзеныя па Ялізаве, дзе пражывае больш за 2,5 тысячы чалавек. Крыўдна, што да «раёнкі» тут чамусьці адносяцца з прахалодай. Спадзяёмся, што ў будучым сітуацыя абавязкова зменіц-ца. Заставайцеся з намі!

Валянціна КОРБАЛЬ.