Павесткі ўручылі маладым асіпаўчанам у Дзень прызыўніка
У чарговы раз шэраг маладых людзей Асіповіччыны аб’ядноўвае ўсім знаёмая падзея — прызыў у войска. З гэтай нагоды днямі ў клубе чыгуначнікаў і адбылося традыцыйнае мерапрыемства, прысвечанае будучым абаронцам Айчыны.
Як заўсёды, на Дзень прызыўніка завіталі прадстаўнікі ўлады і грамадскіх аб’яднанняў раёна: намеснік начальніка і галоўны спецыяліст аддзела ідэалагічнай работы, культуры і па справах моладзі райвыканкама Ігар Петух і Ларыса Волкава, выконваючы абавязкі ваеннага камісара Асіповіцкага і Клічаўскага раёнаў маёр Фёдар Шапавалаў, старшыні райарганізацый ГА “Беларускі саюз афіцэраў” і ГА “Беларускі саюз ветэранаў вайны ў Афганістане” падпалкоўнік запасу Віктар Чыгір і маёр у адстаўцы Юрый Корбан, першы сакратар райкама БРСМ Алена Надзеявец. Без пяці хвілін навабранцы атрымалі слушныя парады, шчырыя пажаданні, наказы служыць выдатна і вярнуцца дадому ў вызначаны тэрмін і без непатрэбных “прыгод”.
Асноўная частка сустрэчы — урачыстае ўручэнне павестак для праходжання тэрміновай воінскай службы. Кожны з хлопцаў разам з дакументам атрымаў і асабістыя пажаданні маёра Шапавалава, і сувенір ад маладзёжнага саюза.
Не абышлося без канцэртнай праграмы. Яркімі выступленнямі парадавалі выхаванцы школы танцаў “Фарт”. З вакальнымі нумарамі выйшлі Вераніка Кузьміч, дуэт “Sweet”, Юрый Корбан, Анастасія Борухава, ансамбль эстраднай песні “До-ми-сольки”. Адметна, што прыняў удзел у канцэрце і спявак з 336 рэабр радавы Павел Кляцуноў, які, дарэчы, ужо праз некалькі дзён звальняецца ў запас.
Падчас вясенняга прызыву-2017 у войска накіруецца каля 80 маладых асіпаўчан, і дзесьці трэць з іх застанецца несці службу ў мясцовым гарнізоне. Лёгкай службы, будучыя абаронцы Айчыны!
Марыя ТАЛЕЙКА. Фота аўтара.
