Гімнастыка. Маленькія асіпаўчанкі, што займаюцца ў клубе мастацкай гімнастыкі “Прынцэса спорту”, прынялі ўдзел у рэспубліканскім турніры “Прынцэса спорту. Зімовая казка-2017”. У Мінск накіравалася 6 каманд асіповіцкіх дзяўчынак першага і другога года навучання. І, што асабліва прыемна, старэйшая група была ўзнагароджана медалём за першае месца ў катэгорыі “Практыкаванне з абручом”. Акрамя таго, усе малыя гімнасткі атрымалі ў падарунак спецыяльныя карпаратыўныя падарункі – вешалкі-мядальніцы.

Спартакіяда. Спаборніцтвы па лёгкай атлетыцы сярод навучэнцаў дзіцяча-юнацкіх спортшкол Магілёўшчыны прайшлі ў сярэдзіне месяца. Асіповіцкая каманда таксама не засталася без узнагарод. Антон Зінкевіч (трэнер Антон Дайнека) заваяваў залатыя медалі па бегу на дыстанцыі 800 і 1500 метраў. Васіль Патрын прабег 60 метраў з чацвёртым рэзультатам – усяго некалькі імгненняў не хапіла хлопцу да прызавога месца. А Максім Хлус (Анатолій Мікуліч) атрымаў “срэбра” ў штурханні ядра.

19-20 студзеня прайшла таксама і абласная спартакіяда школьнікаў па зімоваму шматбор’ю “Здароўе”. Спаборніцтвы праводзіліся па 5 відах спорту: стральба з пнеўматычнай вінтоўкі, скачкі ў даўжыню з месца, згінанне і разгінанне рук ва ўпоры лежачы (дзяўчынкі), падцягванне на высокай перакладзіне (хлопчыкі), лыжныя гонкі. Мясцовая каманда пад кіраўніцтваў настаўнікаў фізічнай культуры гімназіі Васілія Андрыевіча і Анжалікі Бруёк заваявала пачэснае другое месца.