Доўгі ўік-энд, якім адзначаўся сёлета Міжнародны
жаночы дзень, на звыклым рытме сялянскай работы адбіўся нязначна: нагляд за
жывёлай, рамонт тэхнікі, вываз арганічных угнаенняў — не тыя справы, што можна
адкласці на заўтра. Але на сваіх рабочых месцах знаходзіліся не толькі
механізатары і жывёлаводы. 7 сакавіка старшыня райвыканкама Пётр Шукаловіч
правёў нараду з асіповіцкімі аграрыямі і адказнымі асобамі райсельгасхарчу, на
якой якраз і абмяркоўвалася падрыхтаванасць сельгаспрадпрыемстваў да пачатку
вясенніх палявых работ і ход зімоўкі ферм.

Нельга сказаць, што нагодай для збору кіруючых
асоб АПК сталі нейкія звыштэрміновыя нечаканасці ці сур’ёзныя “праколы”: кармоў
у гаспадарках назапашана дастаткова і ўжо відавочна, што ўся патрэбная вясной
тэхніка да 15 сакавіка (устаноўленага тэрміну гатоўнасці) будзе наладжана і
адрэгулявана, а неабходная колькасць паліва атрымана яшчэ на мінулым тыдні.

Тым не менш, акрэсліўшы вынесены на парадак дня
спектр пытанняў, кіраўнік раённай адміністрацыі адзначыў, што ў нашай сельскай
гаспадарцы існуе шэраг праблем, вырашэнне якіх патрабуе пастаянных і напружаных
намаганняў з боку агра-менеджэраў усіх узроўняў.

У першую чаргу гэта сітуацыя, якая складваецца ў
жывёлагадоўлі. Узнікшае ў лютым падзенне малочнай прадукцыйнасці дойнага статка
(у сярэднім на 1,67 кг
ад галавы) — нормай лічыць ніяк нельга, хоць і з’яўляецца яно наступствам
аб’ектыўных прычын. “Дзякуй” анамальна спякотнаму лету: і назапашаныя грубыя
кармы маюць нізкае ўтрыманне спажыўных рэчываў, і каровы асемяняліся не ў
аптымальныя тэрміны. Да таго ж у мінулым годзе значная колькасць цялушак была прададзена
за межы раёна, што таксама адмоўна паў-плывала на вытворчасць малака.

Але ж сітуацыю трэба выпраўляць, таму перад
жывёлаводамі сёння стаяць дзве задачы. Па-першае, тэрмінова, наколькі тое
ўвогуле магчыма, стабілізаваць узровень надояў за кошт павышэння каларыйнасці
рацыёну кароў. Па-другое, ні пры якіх абставінах не дапусціць далейшага
“экспарту” цялушак.

Яшчэ адно пытанне да структур раённага аграпрама
— вытворчая дысцыпліна і яе ўплыў на эфектыўнасць работы кожнай гаспадаркі —
грунтоўна разбіралася падчас агляду канкрэтных аб’ектаў: мехдвара і сховішча
для гародніны ААТ “Пратасевічы”, ферм той жа гаспадаркі і ААТ
“Асіповічыаграпрамтэхзабеспячэнне”.

Ілюстравалася размова рэальнымі сітуацыямі з
практыкі работы сельгаскааператываў. Так, па словах старшыні “Пратасевічаў”
Сяргея Гатальскага, вадзіцеляў двух “МАЗаў”, якія на момант правядзення нарады
павінны былі займацца вывазкай арганікі, нельга было выпускаць у рэйс, бо
знаходзіліся тыя… у стане алкагольнага ап’янення.

Прыклад, магчыма, і не самы красамоўны, аднак па
вывазцы арганічных угнаенняў Асіповіцкі раён пакуль займае апошняе месца ў
вобласці…

Падводзячы вынікі сустрэчы, Пётр Шукаловіч
пад-крэсліў, што гэты год для вядзення сельскай гаспадаркі пакуль вельмі
спрыяльны, таму трэба максімальна выкарыстоўваць кожную магчымасць для
дасягнення найлепшых вынікаў ва ўсіх накірунках дзейнасці гаспадарак. Ну а
дарэмная страта часу і рэсурсаў з’яўляецца для іх кіраўнікоў раскошай проста
недапушчальнай.

Дзмітрый САЎРЫЦКI.