У Асіповіцкім райвыканкаме. Калі мінус задавальняе
На чарговым пасяджэнні райвыканкама, якое прайшло 3 сакавіка пад началам старшыні Пятра Шукаловіча, найбольшая ўвага была нададзена пытанню павышэння эфектыўнасці работы па выкананні заканадаўства, накіраванага на прафілактыку правапарушэнняў, злачынстваў, п’янства, наркаманіі і безнагляднасці сярод непаўналетніх, абарону правоў і законных інтарэсаў апошніх.
Падрабязную інфармацыю па ім зрабіла намеснік старшыні камісіі па справах непаўналетніх райвыканкама Аксана Гарбунова, і можна сказаць, што ў гэтым плане рэгіён рухаецца ў правільным накірунку. Вось толькі асобныя лічбы.
Колькасць зарэгістраваных злачынстваў, здзейсненых падлеткамі на тэрыторыі Асіповіччыны летась, на чвэрць менш — 9 супраць 12 у 2015 годзе. Амаль удвая паменшылася і ўдзельнікаў (6-11), з якіх школьнікаў — 2 (4), выхаванцаў каледжа — 3 (3), з іншых мясцін — 1 (3).
За ўцягванне непаўналетніх у антыграмадскія дзеянні прыцягнута да адказнасці больш за 70 дарослых, работнікаў гандлю за рэалізацыю падлеткам спіртнога і піва — 19 (8), пакіданне іх без нагляду ў вячэрні і начны час — 47 (44).
Але заспакойвацца, як было адзначана пры дэталёвым удакладненні асобных момантаў работы адпаведных структур, на дасягнутым нельга. Трэба ўдасканальваць якасць арганізацыі выяўлення падлеткаў, якія схільныя да супрацьпраўных дзеянняў; абмен інфармацыяй між суб’ектамі прафілактыкі; актыўней працаваць па раз’ядноўванні груп антыграмадскай накіраванасці і г.д.
