РАУС

У перыяд з 28 лістапада па 4 снежня здзейснена 5 крадзяжоў. 28 чысла ў Цэлі шляхам вольнага доступу з лесвічнай пляцоўкі пад’езда аднаго з дамоў невядомая асоба ўкрала дарожны веласіпед “VEKTOR”. На наступны дзень у жыхаркі Лапіч 47-гадовым аднавяскоўцам былі скрадзены электраінструменты коштам 450 рублёў. Пацярпела яшчэ адна грамадзянка з гэтай вёскі — двое непрацуючых землякоў вынеслі з яе гаража металічныя рэйкі. 3 снежня ў магазіне “Еўраопт” па вул. Рабоча-Сялянскай спрабаваў адкрыта ўкрасці бутэльку гарэлкі непрацуючы асіпаўчанін 1971 г.н.

РАСК

Узбуджана 8 крымінальных спраў, у тым ліку ў адносінах да непрацуючага, раней судзімага жыхара Лукі, які 20 кастрычніка каля 17.30 праз акно ў доме па вул. Куйбышава ў Асіповічах выкраў тэлевізар “Panasonic”.

ДАI

Выяўлена 95 фактаў парушэння ПДР, прыцягнуты да адказнасці 2 п’яныя вадзіцелі, 9 парушальнікаў хуткаснага рэжыму, 29 пешаходаў і веласіпедыстаў. Адбылося 11 ДТЗ.

АУСТ

Да адміністрацыйнай адказнасці прыцягнута 69 правапарушальнікаў. Су-праводжана 34 цягнікі, з якіх знята 6 грамадзян. Устаноўлены 3 асобы, якія знаходзіліся ў вышуку.

30 лістапада ў 16.05 40-гадовы жыхар п. Сасновы, кіруючы аўтамабілем “ВАЗ”, праязджаючы цераз чыгуначны пераезд, на якім працавала светлавая і гукавая сігналізацыя, сутыкнуўся з цеплавозам. У выніку ДТЗ вадзіцель атрымаў закрытую чэрапна-мазгавую траўму і іншыя цялесныя пашкоджанні.

Дэпартамент аховы

Да адміністрацыйнай адказнасці прыцягнута 18 чалавек, у тым ліку 6 — за знаходжанне ў грамадскім месцы ў нецвярозым выглядзе, 4 — парушэнне ПДР, 3 — дробныя крадзяжы, 2 — хуліганства. Узбуджаны      2 крымінальныя справы.

РАНС

29 лістапада агнём знішчаны дах, пашкоджана перакрыцце і маёмасць лазні ў Каменічах.

3 снежня адбылося ўзгаранне групы гаспадарчых пабудоў па вул. Цэнтральнай у Замошшы. У выніку пажару знішчаны дах на плошчы 150 м2, пашкоджаны перакрыцці, сцены збудаванняў.

4 чысла загарэўся дом па вул. Прыгараднай у Ялізаве. Нанесена шкода шыфернаму даху, маёмасці, сценам і столі ў доме.

РАНС папярэджвае: пераднавагодні перыяд суправаджаецца рэзкім павелічэннем колькасці пажараў і траўм у выніку парушэння правіл пажарнай бяспекі пры падрыхтоўцы да свят, неасцярожнага абыходжання з піратэхнічнымі вырабамі. Папярэдзіць надзвычайныя сітуацыі — мэта рэспубліканскай акцыі “Бяспечны Новы год”, якая будзе праходзіць у Асіповіцкім раёне з 5 па 30 снежня.

IАЖіРС

Складзены 3 адміністрацыйныя пратаколы за парушэнне правіл лесакарыстання і 1 — за незаконную рыбалку.