РАУС

28 верасня паступіла заява аб крадзяжы з аўтамабіля, які знаходзіўся на тэрыторыі прыватнай піларамы ў в. Малая Гарожа. Вінаватыя ўстаноўлены: двое раней судзімых непрацуючых мужчын. У ЦРБ шпіталізаваны асіпаўчанін: цялесныя пашко-джанні куханнай сякеркай яму нанёс пасынак.

Увага! Аддзяленне па грамадзянстве і міграцыі паведамляе, што з 4 па 7 кастрычніка праводзіцца спецыяльнае комплекснае мерапрыемства “Нелегал”, накіраванае на супрацьдзеянне незаконнай міграцыі.

РАСК

27 верасня ўзбуджаны 2 крымінальныя справы па фактах крадзяжу маёмасці з легкавых аўтамабіляў. Раней судзімы жыхар аг. Краснае, будучы пазбаўленым права займацца дзейнасцю, звязанай з кіраваннем транспартнымі сродкамі, у нецвярозым стане быў затрыманы супрацоўнікамі ДАI за рулём матацыкла.

Па матэрыялах АБЭЗ распачаты крымінальныя справы ў дачыненні асіпаўчаніна, які 1 і 4 жніўня 2015 года растраціў даручаную яму маёмасць крамы на агульную суму 7 млн недэнамінаваных рублёў.

ДАI

Папярэджана 107 фактаў парушэння правілаў дарожнага руху, да адказнасці прыцягнуты 2 нецвярозыя вадзіцелі, 18 парушальнікаў хуткаснага рэжыму, 30 пешаходаў. Адбылося 10 дарожна-транспартных здарэнняў з матэрыяльнымі стратамі.

АУСТ

Узбуджана крымінальная справа, складзена 48 адміністрацыйных пратаколаў і 17 матэрыялаў аб здарэннях, устаноўлена месцазнаходжанне 3 асоб, што знаходзіліся ў вышуку. Суправоджана 48 цягнікоў, з якіх знята 5 правапарушальнікаў.

Дэпартамент аховы

Да адміністрацыйнай адказнасці прыцягнуты 24 чалавекі, у тым ліку самагоншчык, 8 парушальнікаў правілаў дарожнага руху, 11 асоб, што з’яўляліся ў грамадскіх месцах у нецвярозым выглядзе.

Спецізалятар

Для працверажэння размешчана 45 чалавек, сярод іх 5 жанчын, 2 сямейныя скандалісты, 3 пенсіянеры і іншагародні грамадзянін.

РАНС

26 верасня загарэлася гаспадарчая пабудова ў в. Цэль — не стала дашчанага хлява.

2 кастрычніка агнём знішчаны дах, пашкоджана перакрыцце, закураны сцены дачнага дома на ст. Уборак Лапіцкага сельсавета.

IАЖіРС

Складзена 3 адміністрацыйныя пратаколы за парушэнне правілаў рыбалоўства, 2 — лесакарыстання.