…Утульную залу Каўгарскага сельскага клуба
цалкам запоўнілі гледачы рознага ўзросту. Сцэна і сцены памяшкання ўпрыгожаны
ручнікамі і вышыўкамі мясцовых майстрых Марыі Клыгі і Ніны Міхадзюк. Любімых
самадзейных артыстаў публіка вітае гучнымі воплескамі і стоячы… Так пачалася
вечарына, прысвечаная 30-годдзю народнага каўгарскага ансамбля “Вяселле”.

Дырэктар установы культуры Наталля Міхадзюк
зрабіла для прысутных 10-хвілінны экскурс у гісторыю калектыву. Яе аповед
суправаджаўся дэманстрацыяй фотаздымкаў, самыя старыя з якіх датаваліся
пачаткам 1980-х гадоў. Затым слова ўзяла вядучая Таццяна Пухоўская, якая на
працягу ўсяго канцэрта цытавала творы нашых паэтаў: М.Танка, Я.Коласа,
Я.Янішчыц, П.Панчанкі, П.Броўкі, Л.Геніюш, В.Аколавай.

“Вяселле”, у склад якога ўваходзіць 14 чалавек,
ледзьве змясцілася на невялічкай сцэне. Артысты выконвалі ў той вечар
беларускія народныя і рускія аўтарскія песні.

Юбіляраў амаль пасля кожнага нумара выходзілі
віншаваць мясцовыя і прыезджыя госці. Сярод апошніх — старшыня райсавета
дэпутатаў Аляксандр Пузік, начальнік аддзела культуры райвыканкама Iрына
Раманчук, дырэктар цэнтралізаванай клубнай сістэмы Iрына Маслава. Асіпаўчане
ўзнагародзілі “Вяселле” Ганаровай граматай раённага савета дэпутатаў, а
акампаніятара Віктара Ланшчакова і яго жонку-вакалістку Антаніну — Ганаровымі
граматамі аддзела культуры. Навучэнцы Дараганаўскай школы падрыхтавалі для
артыстаў музычныя падарункі.

Цяперашнія “вяселлеўцы” не забыліся на сваіх
ранейшых удзельніц, якія прысутнічалі на свяце. У адрас Марыі Кузьміч, Ганны
Цераш і Ніны Лапікавай прагучалі словы падзякі за дапамогу і пажаданні моцнага
здароўя.

Канцэрт завяршыўся прэм’ерай новай песняй, якую
напісалі адмыслова для гэтага дня Ланшчаковы: “Сёння свята ў нас — юбілей у
“Вяселля”.

Варта адзначыць, што госці найбольш зычылі
каўгарцам папоўніць свой калектыў моладдзю. Сапраўды, калі нашы дзеці ведаюць і
спяваюць родныя песні, Беларусь будзе жыць вечна!

Вольга ЖАРНАСЕК.